अहमदनगर, 18 जून : राज्यात उद्यापासून पोलीस भरतीसाठी उमेदवारांच्या शारिरीक चाचणीसाठीची प्रक्रिया सुरू होणार आहे. दरम्यान, अहमदनगरचे नवनिर्वाचित खासदार निलेश लंके यांनी राज्यात सुरू असलेली पोलीस भरती प्रक्रिया पुढे ढकलण्यात यावी, अशी मागणी केली आहे. राज्याचे मुख्यमंत्री एकनाथ शिंदे तसेच उपमुख्यमंत्री तथा गृहमंत्री देवेंद्र फडणवीस यांच्याकडे पत्राद्वारे ही मागणी केली आहे.
निलेश लंके यांची गृहमंत्र्यांकडे मागणी? –
निलेश लंके यांनी मुख्यमंत्री तसेच गृहमंत्र्यांना पत्र लिहित राज्यभर सुरू होत असलेली पोलीस भरती पुढे ढकलावी अशी मागणी केली आहे. सध्या राज्यभर जोरदार पाऊस पडत आहे, त्यामुळे भरतीसाठी येणाऱ्या उमेदवारांना अनेक समस्यांना सामोरे जावे लागणार आहे. त्यातच पाऊस सुरू असल्याने उमेदवारांचा सराव देखील झालेला नाही. त्यामुळे, ही भरती पुढे ढकलावी, अशी मागणी निलेश लंके यांनी केली आहे.
राज्यात उद्यापासून पोलीस भरती –
राज्यात सर्वीकडे उद्या 19 जून 2024 पासून पोलीस भरती प्रक्रिया राबवली जाणार आहे. पोलीस भरतीसाठी 17 हजार 471 जागांसाठी 17 लाख 76 हजार 256 अर्ज दाखल करण्यात आल्याची माहिती हाती आली आहे. अर्जदारांमध्ये 40 टक्के उमेदवार उच्चशिक्षित असल्याची देखील माहिती समोर आली आहे. पोलीस शिपाई पदांसाठी उद्यापासून जळगाव जिल्ह्यासह राज्यभरात मैदानी चाचणी घेण्यात येणार आहे.
हेही वाचा : मिंधे गँग, भाजप, अजित पवारांच्या राष्ट्रवादीमधून अनेक जण बाहेर पडतील, आदित्य ठाकरे यांचा दावा
