भडगाव, 30 जानेवारी : नवी दिल्लीत अखिल भारतीय मराठी साहित्य संमेलनाचे आयोजन करण्यात आले आहे. 21 ते 23 फेब्रुवारी दरम्यान हे संमेलन पार पडणार आहे. दरम्यान, या संमेलनासाठी भडगाव महाविद्यालयाचे माजी प्राचार्य सुनिल पाटील यांना वक्ते म्हणून आमंत्रित करण्यात आले आहे. याबाबतचे पत्र त्यांना नुकतेच प्राप्त झाले आहे.
‘परिचर्चा – आनंदी गोपाळ’ सत्रासाठी वक्ते म्हणून निवड –
सरहद पुणे आयोजित अखिल भारतीय मराठी साहित्य महामंडळाचे 98 वे अखिल भारतीय मराठी साहित्य संमेलन 21,22 आणि 23 फेब्रुवारी 2025 असे तीन दिवस छत्रपती शिवाजी महाराज साहित्य नगरी (तालकटोरा स्टेडियम) दिल्ली येथे पार पडणार आहे. या साहित्य संमेलनातील दि. 22 फेब्रुवारी 2025 रोजी दुपारी 2.30 वाजता होणाऱ्या ‘परिचर्चा आनंदी गोपाळ’ या सत्रासाठी वक्ते म्हणून त्यांची निवड करण्यात आली आहे.
तब्बल 71 वर्षांनंतरच पहिल्यांदाच संमेलन –
71 वर्षांपूर्वी दिल्लीत झालेल्या साहित्य संमेलनाचे उद्घाटन तत्कालीन पंतप्रधान पंडित नेहरू यांनी केले होते तर स्वागताध्यक्ष काकासाहेब गाडगीळ आणि संमेलनाध्यक्ष तर्कतीर्थ लक्ष्मणशास्त्री जोशी होते संयुक्त महाराष्ट्राच्या स्थापनेनंतर दिल्लीत पहिल्यांदा अखिल भारतीय मराठी साहित्य संमेलन होत आहे. दरम्यान, पंतप्रधान नरेंद्र मोदी हे या संमेलनाचे उद्घाटन करणार आहेत. स्वागताध्यक्ष म्हणून शरद पवार तर संमेलनाध्यक्ष म्हणून डॉ. तारा भवाळकर यांची सन्माननीय निवड झाली आहे.
हेही वाचा : प्रयागराज कुंभमेळा चेंगराचेंगरी प्रकरण; आतापर्यंत 30 भाविकांचा मृत्यू, त्रिवेणी घाटावर नेमकं काय घडलं?
