वारकरी संप्रदायाचे वैभव असलेले ह.भ.प. बाबा महाराज सातारकर यांचं निधन झालं. नवी मुंबईतील नेरूळ इथे त्यांनी अखेरचा श्वास घेतला. ते 89 वर्षांचे होते. त्यांच्या पार्थिवावर उद्या शुक्रवारी 27 ऑक्टोबरला संध्याकाळी 5 वाजता नेरुळ येथे अंत्यसंस्कार होणार आहेत.
रोखठोक वाणी आणि शुद्ध विचार हे बाबा महाराज सातारकर यांचं व्रत होतं. त्यांनी आपलं आयुष्य अध्यात्माच्या प्रचार प्रसारासाठी अर्पण केलं. किर्तनाच्या माध्यमातून त्यांनी जनसामान्यांचं प्रबोधन केलं. त्यांचं पार्थिव आज दुपारी तीननंतर अंतिम दर्शनासाठी नेरूळ जिमखाना समोर असलेल्या विठ्ठल रुक्मिणी मंदिरात ठेवण्यात येईल.
बाबा महाराज सातारकर यांच्या निधनाने कीर्तनाच्या माध्यमातून समाजाचे प्रबोधन करणारे वारकरी संप्रदायातील एक ज्येष्ठ कीर्तनकार काळाच्या पडद्याआड गेले आहेत, या शब्दात शोक व्यक्त केला जात आहे.
दरम्यान, यावर्षीच्या सुरुवातीलाच फेब्रुवारी महिन्यात बाबा महाराज सातारकर यांच्या पत्नी रूक्मिणी सातारकर ऊर्फ माई सातारकर यांचं निधन झालं होतं. त्यानंतर 8 महिन्यानंतर बाबा महाराज सातारकर यांचीही प्राणज्योत मालवली.
