ठाणे, 10 फेब्रुवारी : राज्याचे उपमुख्यमंत्री तथा शिवसेना पक्षप्रमुख एकनाथ शिंदे यांचा वाढदिवस मोठ्या उत्साहात साजरा करण्यात आला. दरम्यान, एकनाथ शिंदेंच्या वाढदिवसानिमित्त राज्यातील उपमुख्यमंत्री वैद्यकीय मदत कक्षाची घोषणा करण्यात आली असून या वैद्यकीय मदत कक्षाची जबाबदारी मंगेश चिवटे यांच्याकडे देण्यात आली आहे. दरम्यान, राज्याचा सार्वजनिक आरोग्य विभाग व महात्मा फुले जन आरोग्य योजनेशी हा कक्ष संलग्न राहणार असल्याने गरजू रुग्णांना याचा मोठा फायदा मिळणार आहे, असे यावेळी उपमुख्यमंत्री एकनाथ शिंदे यांनी सांगितले.
उपमुख्यमंत्री एकनाथ शिंदे यांच्या हस्ते उपमुख्यमंत्री वैद्यकीय मदत कक्षाच्या अधिकृत लोगोचे अनावरण करण्यात आले. यावेळी केंद्रीय आरोग्य राज्य मंत्री प्रतापराव जाधव, सार्वजनिक आरोग्य मंत्री प्रकाश आबिटकर, परिवहन मंत्री प्रताप सरनाईक, अर्थ व नियोजन राज्यमंत्री आशिष जैस्वाल, शिवसेना वैद्यकीय मदत कक्ष प्रमुख मंगेश चिवटे, आदी उपस्थित होते.
मंगेश चिवटेंकडे जबाबदारी –
एकनाथ शिंदे मुख्यमंत्री असताना मुख्यमंत्री वैद्यकीय सहाय्यता निधीची जबाबदारी मंगेश चिवटे यांच्याकडे देण्यात आली होती. यावेळी मुख्यमंत्री सहाय्यता निधी कक्षाचे मंगेश चिवटे प्रमुख असताना या कक्षातून तब्बल 419 कोटी निधी वितरित केला गेला होता. परिणामी 51 हजार पेक्षा अधिक रुग्णांचे प्राण वाचविण्यात मुख्यमंत्री सहाय्यता निधी कक्षाला यश आले. दरम्यान, एकनाथ शिंदे उपमुख्यमंत्री होताच आता पुन्हा एकदा मंगेश चिवटे यांच्याकडे उपमुख्यमंत्री वैद्यकीय मदत कक्षाची जबाबदारी सोपविण्यात आली आहे.
कोण आहेत मंगेश चिवटे? –
एकनाथ शिंदे हे मुख्यमंत्री असताना मंगेश चिवटे मुख्यमंत्री वैद्यकीय सहाय्यता निधी कक्षाचे प्रमुख होते. त्यावेळी त्यांनी आरोग्य निधी गरजूपर्यंत पोहोचवण्याची कामगिरी उत्तमरित्या सांभाळली होती. तत्पूर्वी, कोरोना महामारिच्या काळात मंगेश चिवटे यांनी अत्यंत महत्वाची जबाबदारी पार पाडली होती. त्यावेळी त्यांनी असंख्य गरजूंना मदत केली होती. कोरोना काळात त्यांनी केलेल्या कामामुळे त्यांना आरोग्यदूत म्हणून संबोधले गेले. यासोबतच मराठा आरक्षणाच्या मागणीसाठी आंदोलन करणाऱ्या मनोज जरांगे यांच्या तिसऱ्या टप्प्यातील आंदोलनावेळी सरकारच्या शिष्टमंडळात मंगेश चिवटे यांचा समावेश होता.
हेही पाहा : IPS Dr. Maheshwar Reddy: सोशल मीडिया, क्राइम, तरुणाई; Jalgaon SP डॉ. महेश्वर रेड्डींची विशेष मुलाखत
