जळगाव : ‘मी सांगितलं होतं का त्यांना कर्ज घ्यायला, त्यांनी पापं करायची आणि मग कुणी पापं काढली तर गुलाबराव त्यांना घेरतायेत, मी त्यांना निवडणुकीत आडवं केलं आहे. मी काय त्यांना घेरू?,’ असे म्हणत मंत्री गुलाबराव पाटील यांनी माजी मंत्री गुलाबराव देवकर यांच्यावर जोरदार टीका केली. मंत्री गुलाबराव पाटील यांच्याकडून माजी मंत्री गुलाबराव देवकर यांना घेरण्याचा प्रयत्न केला जात आहे, असं बोललं जात असताना या प्रश्नावर मंत्री गुलाबराव पाटील यांनी गुलाबराव देवकर यांच्यावर जोरदार निशाणा साधला.
राष्ट्रवादी काँग्रेसचे (शरद पवार) माजी मंत्री गुलाबराव देवकर यांनी जळगाव जिल्हा मध्यवर्ती सहकारी बँकेचे अध्यक्ष असताना 2021 मध्ये आपल्या शैक्षणिक संस्थेच्या नावे सुमारे 10 कोटी रुपयांचे कर्ज घेतले होते. त्यासंदर्भात करण्यात आलेल्या तक्रारीनंतर सहकार विभागाने चौकशीचे आदेश काढले आहेत. गुलाबराव देवकर हे कर्ज बेकायदेशीरपणे काढल्याचा आरोप करण्यात आला आहे. याबाबत माध्यमांशी बोलताना मंत्री गुलाबराव पाटील म्हणाले की, शेतकऱ्यांना त्या काळात पैसे देण्यासाठी यांच्याकडे पैसे नव्हते आणि ज्या काळात शेतकऱ्यांना कर्ज मिळवण्यासाठी मी मोर्चा काढला होता, त्यावेळी याच लोकांनी आमच्यावर दरोडेखोर म्हणून गुन्हे दाखल केले होते आणि त्याच काळात काही दिवसांनी देवकर आप्पांनी स्वत: चेअरमन असताना स्वत:च्या सहीने दहा कोटी रुपये कर्ज घेतले आहे आणि ते कशासाठी घेतले आहे, तर त्यांच्या शेतीसाठी घेतलेले नाही, त्यांच्या फळबागांकरता घेतलेले नाही. तर हे कर्ज श्रीकृष्ण संस्था, जी त्यांची शालेय संस्था आहे, इंजीनिअरींग कॉलेज आहे, त्यासाठी घेतलेले आहे.
म्हणजे ही संस्था शेतकऱ्यांच्या सोसायट्यांच्या पैशांवर किंवा शेतकऱ्यांच्या कर्जाच्या व्याजावर चालते, त्यांना कर्ज द्यायचं नाही. इकडे शेतकऱ्याचं कर्ता करविता म्हणायचं आणि त्याच संस्थेतून आपल्या संस्थेसाठी कर्ज घ्यायचं. इतकंच नव्हे तर त्यांची दोन-तीन प्रकरणं आहेत. ती बाहेर येणारंच आहेत. हे लोकांमध्ये जे पांढरे कपडे घालून आव आणत असतात, त्यांचा याठिकाणी लोकांसमोर पर्दाफाश होणार आहे, असेही मंत्री गुलाबराव पाटील म्हणाले.
दरम्यान, गुलाबराव देवकर यांना गुलाबराव पाटील यांच्याकडून घेरण्याचा प्रयत्न केला जात आहे, असं बोललं जात असताना या प्रश्नावर मंत्री गुलाबराव पाटील म्हणाले की, ‘मी सांगितलं होतं का त्यांना कर्ज घ्यायला, त्यांनी पापं करायची आणि मग कुणी पापं काढली तर गुलाबराव त्यांना घेरतायेत, मी त्यांना निवडणुकीत आडवं केलं आहे. मी काय त्यांना घेरू?,’ असे म्हणत मंत्री गुलाबराव पाटील यांनी माजी मंत्री गुलाबराव देवकर यांच्यावर जोरदार टीका केली.
