अमळनेर (जळगाव) , 26 सप्टेंबर : जळगाव लोकसभा मतदारसंघाच्या उमेदवारीसाठी ज्येष्ठ सरकारी वकील ॲड. उज्ज्वल निकम यांचे नाव चर्चेत असल्याचे सांगितले जात आहे. यामुळे जळगाव लोकसभा मतदारसंघाचे विद्यमान खासदार उन्मेश पाटील यांचे तिकीट कापले जाणार की काय, अशा चर्चा रंगल्या आहेत. यावर आता स्वत: खासदार उन्मेश पाटील यांनी प्रतिक्रिया दिली.
काय म्हणाले खासदार उन्मेश पाटील? –
उज्ज्वल निकम यांना जळगाव लोकसभा मतदार संघाची उमेदवारी मिळणार असल्याच्या चर्चेवरुन खासदार उन्मेश पाटील म्हणाले की, मी खासदारकीच्या काळात जिल्ह्यामध्ये अनेक विकासकामे केली. देशातल्या टॉप टेन खासदारांमध्ये सुद्धा मी होतो. आमचा पक्ष प्रचंड हुशार आणि चाणाक्ष आहे. त्यामुळे माझी कामगिरी लक्षात घेऊन पक्ष योग्य तो निर्णय घेईल. खासदार म्हणून जी जबाबदारी पार पडली, त्यानंतरही पक्ष, पक्षाचे वरिष्ठ नेते जो काही निर्णय घेतील, तो मला मान्य राहील. त्या निर्णयाशी मी बांधिल राहील, अशी प्रतिक्रिया खासदार पाटील यांनी दिली.
मी भाजपचा प्रामाणिक सैनिक –
दरम्यान, खासदार उन्मेश पाटील यांना लोकसभेची उमेदवारी न मिळल्यास ते राष्ट्रवादीत जाणार असल्याचीही चर्चा केली जात आहे. यावरही खासदार उन्मेश पाटील यांनी प्रतिक्रिया दिली. ते म्हणाले की, पक्ष बदलण्याचा निर्णय मुळीच नाही. कुणीतरी काहीतरी वावड्या उठवित आहे. झारीतले शुक्राचार्य प्रकाराला वेगळ रुप देण्याचा प्रयत्न करत असतील, पण मी भाजपचा एक प्रामाणिक सैनिक म्हणून काम करतोय आणि करत राहील, असे ते म्हणाले.
उज्वल निकम यांच्याबाबत काय म्हणाले? –
उज्वल निकम यांच्याशी पारिवारिक संबंध आहे, ते आमचे मार्गदर्शक आहे. मात्र, ते सुध्दा लोकसभेच्या उमेदवारीबाबत त्यांची भूमिका मांडतील, असेही उन्मेश पाटील यांनी स्पष्ट केलं.
