बीड, 6 फेब्रवारी : राज्याचे उपमुख्यमंत्री अजित पवार यांचे 28 जानेवारी रोजी झालेल्या विमान अपघातात दुर्दैवी निधन झाले. मुंबईहून बारामतीकडे रवाना झालेले विमान धावपट्टीवर उतरण्याच्या काही क्षण आधी कोसळले. या भीषण अपघातात अजित पवार यांच्यासह पाच जणांचा मृत्यू झाला. या घटनेमुळे संपूर्ण महाराष्ट्रावर शोककळा पसरली असून सध्या नागरी विमान वाहतूक संचालनालयाकडून अजित दादांच्या विमान अपघात प्रकरणाची चौकशी करण्यात येत आहे.
दरम्यान, या दुर्घटनेबाबत आता विविध तर्कवितर्कांना सुरुवात झाली असून, अपघाताच्या नेमक्या कारणांबाबत चर्चा सुरू असताना राष्ट्रवादी शरद पवार गटाचे खासदार बजरंग सोनवणे यांनी संशय व्यक्त केला आहे. “अजित पवार यांच्या विमानात बॉम्ब होता का?” असा सवाल त्यांनी उपस्थित केला असून, विमान जमिनीला स्पर्श होण्याआधीच स्फोट झाल्याचा दावा त्यांनी केला आहे.
खासदार बजरंग सोनवणे काय म्हणाले? –
याबाबत बोलताना बजरंग सोनवणे म्हणाले की, “सीसीटीव्ही फुटेजमध्ये स्पष्टपणे दिसते की विमान जमिनीला टच होऊन नंतर कोसळलेले नाही. विमान खाली येताना तिरके झाले होते, मात्र जमिनीला स्पर्श होण्याआधीच त्याचा स्फोट झाला. त्या स्फोटामुळे विमानाच्या पुढील भागातील प्रवासी बाहेर फेकले गेले आणि त्यानंतर विमान जमिनीला आदळून मोठा स्फोट झाला. त्यामुळे ही घटना संशयास्पद नाही का? विमानात बॉम्ब होता की इंजिनचा स्फोट झाला, याची सखोल चौकशी होणे आवश्यक आहे,” असे विविध प्रश्न त्यांनी उपस्थित केले.
View this post on Instagram
नागरी विमान वाहतूक संचालनालयाकडून चौकशी सुरू –
जिल्हा परिषदेच्या निवडणुकांच्या पार्श्वभूमीवर 28 जानेवारी रोजी बारामतीत अजित पवार यांच्या चार सभा आयोजित करण्यात आल्या होत्या. या सभांसाठी ते नेहमीप्रमाणे आज सकाळी लवकर मुंबईहून बारामतीकडे रवाना झाले होते. मात्र, बारामतीत विमान लँडिंग करत असताना अचानक भीषण अपघात झाला. या विमानात अजित पवार यांच्यासह आणखी पाच जण प्रवास करत होते. अपघाताची तीव्रता इतकी भीषण होती की, या दुर्घटनेत अजित पवार यांच्यासह पाच जणांचा दुर्दैवी मृत्यू झाला. दरम्यान, या घटनेची चौकशी नागरी विमान वाहतूक संचालनालयाकडून करण्यात येत आहे.
अपघात झालेल्या विमानात कोण-कोण होतं? –
- अजित दादा पवार
- विदीप जाधव (अजित पवार यांचे खासगी सुरक्षारक्षक, मुंबई)
- पायलट कॅप्टन सुमित कपूर
- कॅप्टन संभवी पाठक
- पिंकी माळी, फ्लाईट अटेंडंट
हेही वाचा : अजित पवारांच्या निधनानंतर उपमुख्यमंत्री एकनाथ शिंदेंचा मोठा निर्णय; कार्यकर्त्यांसाठी केलं महत्वाचं आवाहन
