ईसा तडवी, प्रतिनिधी
पाचोरा, 13 डिसेंबर : राज्यासह जळगाव जिल्ह्यात अपघाताच्या घटनांमध्ये वाढ होत असताना पाचोरा शहरातून धक्कादायक घटना समोर आली आहे. 10 वर्षीय चिमुरडा ट्रॅक्टरच्या चाकाखाली सापडल्याने जागीच ठार झाला आहे. पाचोरा शहरातील शक्तीधाम या भागात आज साडेचार ते पाच वाजेच्या सुमारास ही घटना घडली. रुद्र जितेंद्र गोसावी असे मयत मुलाचे नाव आहे. याप्रकरणी पाचोरा पोलिस स्टेशनमध्ये ट्रॅक्टर चालकाविरुद्ध गुन्हा नोंदविण्यात आला आहे.
काय आहे संपुर्ण बातमी? –
मिळालेल्या माहितीनुसार, पाचोरा शहरातील भडगाव रोडवरील राजीव गांधी कॉलनीत जितेंद्र गोसावी हे पत्नी, दोन मुले, वृद्ध आईसह वास्तव्यास आहेत. जितेंद्र गोसावी यांचा मोठा मुलगा रुद्र जितेंद्र गोसावी (वय – 10 वर्ष) हा येथील कै. पी. के. शिंदे माध्यमिक विद्यालयात इयत्ता तिसरीत शिक्षण घेत होता. दरम्यान, आज 13 डिसेंबर रोजी सायंकाळी 5 वाजेच्या सुमारास शाळा सुटल्यानंतर रुद्र हा सायकल घेऊन शक्तीधामच्या दिशेने खेळण्यासाठी जात होता.
ट्रॅक्टरच्या चाकाखाली आल्याने ठार –
दरम्यान, याचवेळी समोरुन येणाऱ्या भरधाव ट्रॅक्टरला बघुन रुद्र याचा सायकलीवरील तोल गेल्याने रुद्र हा थेट ट्रॅक्टरच्या मोठ्या चाकाखाली आला. रुद्र याच्या डोक्याला जबर मार लागल्याने त्याचा मृत्यू झाला. यानंतर सदरचा प्रकार रुद्र याच्या आई, वडिलांना कळताच एकच हंबरडा फोडत त्यांनी घटनास्थळी धाव घेतली. दरम्यान, घटनास्थळावरुन रुद्रचा मृतदेह मुकेश पाटील (पुनगाव) यांनी रुग्णवाहिकेतुन पाचोरा ग्रामीण रुग्णालय येथे दाखल केला.
ट्रॅक्टर चालकाविरोधात गुन्हा दाखल –
पाचोरा शहरातील या अपघाताच्या घटनेप्रकरणी पाचोरा पोलिस स्टेशनमध्ये जितेंद्र गोसावी यांच्या फिर्यादीवरून ट्रॅक्टर चालक विजय उर्फ बबलु अशोक थोरात (रा. पुनगाव ता. पाचोरा) याचे विरुद्ध गुन्हा नोंदविण्यात आला असून घटनेचा तपास पोलीस निरीक्षक अशोक पवार यांच्या मार्गदर्शनाखाली सहाय्यक फौजदार पांडुरंग सोनवणे हे करीत आहे.
