मुंबई, 5 सप्टेंबर : दिव्यांग प्रवाशांना यापुढे एसटीच्या सर्व प्रकारच्या बसमध्ये आरक्षित आसन कायमस्वरूपी देण्यात आले आहे. दरम्यान, ते कोणत्याही थांब्यावर चढल्यास त्यांना त्यांचे आरक्षित आसन उपलब्ध करून देण्याचे जबाबदारी संबंधित वाहकाची असणार आहे. त्यामुळे दिव्यांगाचा प्रवास यापुढे अधिक सुखकर व आरामदायी होणार आहे.
दिव्यांगासाठी आसन राखीव –
एसटी महामंडळाच्या वाहतूक विभागाने एक परिपत्रक काढून एसटीच्या वेगवेगळ्या प्रकारच्या बसेसमध्ये दिव्यांगांना आरक्षण आसने निश्चित केलेली आहेत. साध्या बसेस पासून शिवनेरी बसेस पर्यंत दिव्यांग प्रवाशांना प्रवासाच्या कोणत्याही टप्प्यावर त्यांचे आरक्षित आसन केवळ त्यांच्यासाठी राखीव ठेवण्याचे सूचना एसटी महामंडळाने स्थानिक एसटी प्रशासनाला दिलेल्या आहेत.
वाहकावर असेल जबाबदारी –
ज्यावेळी बसमध्ये दिव्यांग प्रवासी प्रवास करित नसतील तेव्हा ते आसन सामान्य प्रवाशांसाठी उपलब्ध होईल. तथापि, दिव्यांग प्रवासी कोणत्याही थांब्यावर बसमध्ये चढल्यावर त्यांना ते आसन तातडीने उपलब्ध करुन देण्याची जबाबदारी संबधित वाहकाची असेल.
दिव्यांग प्रवाशांना करावी लागणार मदत –
याबरोबरच दिव्यांगांना प्रवास करताना कोणती अडचण येऊ नये म्हणून त्यांना चढ-उतार करताना प्राधान्य द्यावे. तसेच त्यांचा थांबा आल्यानंतर त्यांना अवगत करून बसमधून उतरण्यासाठी चालक वाहकांनी सर्वतोपरी मदत करावी, असे निर्देश देखील देण्यात आलेली आहेत.
एसटी कर्मचाऱ्यांच्या पगारात वाढ –
राज्यभरातील एसटी कर्मचाऱ्यांनी काल अखेर संप मागे घेतला. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या उपस्थितीत सह्याद्री अतिथीगृह येथे पार पडलेल्या एसटी कर्मचारी संघटनांच्या 26 प्रतिनिधींसह आज बैठकीत संप मागे घेण्याचा निर्णय घेण्यात आला. दरम्यान, या बैठकीत एसटी कर्मचाऱ्यांनी सरकारकडे 5 हजार रुपयांच्या वेतनवाढीची मागणी केली. तसेच विविध देखील मागण्या मांडल्या. मुख्यमंत्री आणि उपमुख्यमंत्र्यांनी एसटी कर्मचाऱ्यांची बाजू ऐकून घेत राज्य सरकारने एसटी कर्मचाऱ्यांच्या मूळ वेतनात तब्बल 6500 रुपयांची वाढ करण्याचे जाहीर केले आहे.
हेही वाचा : ”….म्हणून तुम्हाला माफी मागावी लागते,” सांगलीत राहुल गांधी यांचा पंतप्रधान मोदी यांच्यावर निशाणा
