मुंबई : स्वत:ला हिंदुत्ववादी म्हणणाऱ्या पंतप्रधान नरेंद्र मोदी यांना पुन्हा एकदा हिंदुहृदयसम्राट बाळासाहेब ठाकरे यांचा विसर पडला आहे, या शब्दात शिवसेना उद्धव बाळासाहेब ठाकरे या पक्षाचे नेते आणि राज्यसभा खासदार संजय राऊत यांनी पंतप्रधान मोदी यांच्यावर निशाणा साधला. पंतप्रधान नरेंद्र मोदी यांनी काल भारतरत्न पुरस्कार जाहीर केले. यामध्ये पंतप्रधान नरेंद्र मोदी यांनी भारताचे माजी पंतप्रधान पी. व्ही. नरसिंहराव, चौधरी चरणसिंह आणि ज्येष्ठ शास्त्रज्ञ एम एस स्वामीनाथन यांच्या नावांची घोषणा केली. दरम्यान, संजय राऊत यांनी ट्विट करत मोदींवर निशाणा साधला.
काय म्हणाले संजय राऊत –
स्वत:ला हिंदुत्ववादी म्हणवणाऱ्या पंतप्रधान मोदींना पुन्हा एकदा हिंदुहृदयसम्राट बाळासाहेब ठाकरे यांचा विसर पडला आहे. अवघ्या एका महिन्यात आधी दोन आणि आता तीन नेत्यांना भारतरत्न देऊन गौरविण्यात आले आहे. मात्र, भारतरत्नासाठी अधिक पात्र असणारे वीर सावरकर किंवा शिवसेनाप्रमुख बाळासाहेब ठाकरे यांच्याकडे दुर्लक्ष करण्यात आले आहे. खरंतर एका वर्षात तीन व्यक्तींना भारतरत्न देऊन सन्मानित केले जाऊ शकते. मात्र, पंतप्रधान मोदींनी पाच भारतरत्नांची घोषणा केली आहे. निवडणुका तोंडावर आहेत, यावरुन हे स्पष्ट होत आहे.
कर्पुरी ठाकूर आणि लालकृष्ण अडवाणी यांच्यानंतर चौधरी चरण सिंग, पीव्ही नरसिंह राव आणि एम एस स्वामिनाथन यांना भारतरत्न हा सन्मान जाहीर झाला आहे. पण इतर नेतेही वाट पाहत आहेत. मात्र, देशावर पसरलेल्या हिंदू लाटेचे खरे शिल्पकार बाळासाहेब ठाकरे यांना पंतप्रधान का विसरले? असा सवाल करत बाळासाहेबांमुळेच पंतप्रधान मोदींना अयोध्येत राम मंदिराचा प्राणप्रतिष्ठापना सोहळा पार पडला, हे लक्षात ठेवा असेही ते म्हणाले.
Prime Minister Modi who calls himself Hindutva-vadi has once again forgotten Hindu Hridaysamrat Balasaheb Thackeray. First two and now three leaders have been honoured with Bharat Ratna in barely one month. However, neither Veer Savarkar nor Shiv Sena supremo Balasaheb Thackeray… pic.twitter.com/IkKZSCjjIq
— Sanjay Raut (@rautsanjay61) February 9, 2024
पंतप्रधान नरेंद्र मोदी यांच्याकडून भारतरत्न पुरस्कारांची घोषणा
भारताचे माजी पंतप्रधान पीव्ही नरसिंह राव, चौधरी चरण सिंह आणि डॉक्टर एमएस स्वामिनाथन यांना भारतरत्न पुरस्कार जाहीर करण्यात आले आहेत. भारताचा सर्वोच्च नागरी पुरस्कार असलेल्या भारतरत्न पुरस्काराची माहिती काल पंतप्रधान नरेंद्र मोदी यांनी सोशल मीडियावर फोटो शेअर करत दिली. दरम्यान, यामध्ये अद्याप शिवसेनाप्रमुख बाळासाहेब ठाकरे यांना भारतरत्न पुरस्कार जाहीर झाल्यामुळे शिवसेना नेते संजय राऊत यांनी नाराजी व्यक्त करत पंतप्रधान नरेंद्र मोदींवर टीका केली.
