नागपूर : येत्या 30 मार्चला गुढीपाडवा आहे. या गुढीपाडव्याच्या दिवशी पंतप्रधान नरेंद्र मोदी हे महाराष्ट्र दौऱ्यावर येणार आहेत. त्यानिमित्ताने दौऱ्याची तयारी देखील सुरू झाली आहे.
नागपूरमध्ये माधव नेत्रालयाच्या विस्तारीकरण प्रकल्पाचे भूमिपूजन होणार आहे. या कार्यक्रमाला पंतप्रधान नरेंद्र मोदी हे उपस्थित राहणार आहे. यानिमित्ताने राष्ट्रीय स्वयंसेवक संघाचे सरसंघचालक डॉ. मोहन भागवत हे नागपुरात एकाच व्यासपीठावर येणार आहेत. यानिमित्ताने राम मंदिर कार्यक्रमानंतर पहिल्यांदाच पंतप्रधान मोदी आणि डॉ. मोहन भागवत एकाच मंचावर दिसणार आहेत.
माधव नेत्रालय आय इन्स्टिट्यूट आणि रिसर्च सेंटरची नवीन इमारत हिंगणा रोडवर प्रस्तावित आहे. त्यामुळे येत्या 30 मार्चला गुढीपाडव्याच्या दिवशी सकाळी 10 वाजता नवीन इमारतीचा भूमिपूजन समारंभ होणार आहे. यासाठी पंतप्रधान नरेंद्र मोदींना निमंत्रित करण्यात आले आहे.
या कार्यक्रमात प्रमुख पाहुणे डॉ. मोहन भागवत असतील. तसेच यासोबतच मुख्यमंत्री देवेंद्र फडणवीस, केंद्रीय मंत्री नितीन गडकरी, स्वामी गोविंददेवगिरी महाराज हेदेखील या कार्यक्रमाला उपस्थित राहणार आहेत.
517 कोटी रुपये खर्चून 5.83 एकर जागेवर माधव नेत्रालय बांधले जाणार आहे. यात 250 खाटा असतील आणि एक धर्मादाय वॉर्ड देखील असेल, जिथे लोकांना जागतिक दर्जाची नेत्रसेवा नाममात्र शुल्कात दिली जाईल. त्याचे काम येत्या तीन वर्षांत पूर्ण होण्याची शक्यता आहे.
कार्यक्रमानंतर पंतप्रधान मोदी मोदी हे स्मृती मंदिरात जाऊन आरएसएसचे संस्थापक केशव बळीराम हेडगेवार यांना आदरांजली अर्पण करू शकतात. तसेत पंतप्रधान हे दीक्षाभूमीलाही भेट देण्याची शक्यता आहे.
हेही वाचा – ‘कोणत्याही वाळू माफियांना संरक्षण मिळणार नाही, आठवडाभरात राज्याचं उत्कृष्ट वाळू धोरण जाहीर होणार’
