जळगाव, 4 सप्टेंबर: भारतीय जनता पक्षाच्या उत्तर महाराष्ट्र विभागीय कार्यालय प्रमुखपदी नाशिक येथील सक्रिय कार्यकर्ते शिवम शिंपी यांची नियुक्ती करण्यात आली आहे. भाजप महाराष्ट्र प्रदेशाध्यक्ष रवींद्र चव्हाण यांनी अधिकृत पत्राद्वारे त्यांच्या नियुक्तीची घोषणा केली.
शिवम शिंपी हे मूळचे जळगाव जिल्ह्यातील नगरदेवळा येथील रहिवासी असून त्यांचे प्राथमिक शिक्षण नगरदेवळा येथे झाले. त्यानंतर त्यांनी जळगाव येथे उच्च शिक्षण घेतले. शिक्षण पूर्ण झाल्यानंतर नोकरीनिमित्त ते नाशिक येथे स्थायिक झाले.
नाशिक येथे आल्यानंतर त्यांनी भाजपच्या सोशल मीडिया टीममध्ये काम करत पक्षाच्या विविध कार्यक्रम, उपक्रम आणि अभियानांच्या नियोजनासह त्यांचे प्रभावी रिपोर्टिंग केले. तसेच पक्षाच्या कार्यालयीन व्यवस्थापनातही त्यांनी योगदान दिले. गेल्या सहा वर्षांपासून त्यांनी उत्तर महाराष्ट्र समन्वयक म्हणून जबाबदारी सांभाळली आहे.
लोकसभा, विधानसभा तसेच स्थानिक स्वराज्य संस्थांच्या निवडणुकांमध्ये नियोजनबद्ध पद्धतीने काम करत त्यांनी पक्षाच्या संघटनात्मक बांधणीत योगदान दिले. पक्षाचे वरिष्ठ नेते, लोकप्रतिनिधी, पदाधिकारी तसेच सामान्य कार्यकर्त्यांशी असलेला थेट संपर्क आणि मनमिळाऊ स्वभावामुळे त्यांची पक्षात विश्वासू कार्यकर्ता म्हणून ओळख निर्माण झाल्याचे सांगितले जाते.
‘पदापेक्षा जबाबदारी मोठी’ –
नियुक्तीबद्दल प्रतिक्रिया देताना शिवम शिंपी म्हणाले, “हे पद नसून पक्षाने माझ्यावर टाकलेली मोठी जबाबदारी आहे. एका सामान्य कार्यकर्त्याच्या निष्ठेचा आणि मेहनतीचा पक्षश्रेष्ठींनी केलेला हा सन्मान आहे. उत्तर महाराष्ट्रातील पदाधिकारी, लोकप्रतिनिधी आणि कार्यकर्त्यांना पक्षाच्या कामकाजाची माहिती वेळेवर देणे, त्यांच्या अडीअडचणी जाणून घेणे आणि सर्व विषयांचे अहवाल अद्ययावत ठेवणे ही माझी प्रमुख जबाबदारी असेल.”
दरम्यान, या नियुक्तीबद्दल उत्तर महाराष्ट्रातील भाजपच्या वरिष्ठ नेत्यांसह लोकप्रतिनिधी, पदाधिकारी आणि कार्यकर्त्यांनी शिवम शिंपी यांचे अभिनंदन करत पुढील वाटचालीस शुभेच्छा दिल्या आहेत.
