धरणगाव, 24 डिसेंबर : राज्यात वाढत्या अपघाताच्या घटना समोर येत असताना जळगाव जिल्ह्यातील धरणगाव तालुक्यातून लक्झरी बसच्या अपघाताची बातमी समोर आली आहे. गुजरातमधून अकोला येथे जाणाऱ्या लक्झरी बसचा धरणगाव तालुक्यातील वराडसिम गावाजवळ महामार्गावर उलटल्याने भीषण अपघात झाल्याची घटना घडलीय. या अपघातात महिला प्रवाशीचा जागीच मृत्यू झाला तर इतर प्रवासी जखमी झाल्याची माहिती समोर आली आहे. ही घटना आज मंगळवारी 24 डिसेंबर रोजी सकाळी साडेसहा वाजेच्या सुमारास घडली.
लक्झरी बसचा भीषण अपघात –
मिळालेल्या माहितीनुसार, गुजरात राज्यातील सुरत येथून लक्झरी बस क्रमांक (जीजे 01 डीवाय 5502)एरंडोल मार्गे मलकापूर येथे जात होती. या लक्झरी बसवर साड्यांचे गाठोडे ठेवण्यात आलेले होते. दरम्यान, धरणगाव तालुक्यातील वराडसिम गावाजवळ साड्यांचे गाठोडे एका साईडला झाल्याने चालकाचे लक्झरी बसवरील नियंत्रण सुटल्याने बस उलटली. या अपघातात एक महिला जागीच ठार तर, दहा ते पंधरा प्रवासी जखमी झाले आहेत.
एक महिला जागीच ठार –
धरणगाव तालुक्यातील झालेल्या अपघाताच्या घटनेत कविता सिद्धार्थ नरवाडे (वय-30, रा. भीम नगर, उधना, गुजरात) या प्रवासी महिलेचा जागीच मृत्यू झाला. तर सोपान नारायण सपकाळ (वय-54, रा. नरवेल ता. मलकापूर), विठ्ठल अमृत कोगदे (वय-75, रा.पळशी ता. बाळापूर जि. अकोला), विश्वनाथ नामदेव वाघमारे (वय-65 रा.वरणगाव), प्रशांत गजानन धांडे (वय-33, रा.नरवेल ता. मलकापूर) यांच्यासह इतर 8 ते 10 प्रवासी हे जखमी झाल्याची माहिती समोर आली आहे. दरम्यान, या अपघाताच्या घटनेत जखमींना जळगाव जिल्हा शासकीय वैद्यकीय महाविद्यालयात उपचारासाठी दाखल करण्यात आले आहे.
हेही पाहा : Mla Amshya Padvi: खान्देशातील आदिवासी आमदार यांचं विकासाचं व्हिजन काय?, थेट नागपूर अधिवेशनातून संवाद
