चंद्रकांत दुसाने, विशेष प्रतिनिधी
पाचोरा, 23 ऑक्टोबर : भूतकाळात लोकप्रतिनिधी म्हणून माझ्याकडून अथवा शिवसेना-भाजपच्या कार्यकर्त्यांकडून ज्या काही चूका झाल्या असतील, ते विसरूया. आणि त्या चुका आता भविष्यकाळात होऊ नये त्यासाठी समिती नेमून त्यावर न्याय देण्याचा काम करूयात. मात्र, सध्यास्थितीत जो संदेश जातोय..तो अत्यंत चुकीचा आहे. म्हणून शिवसेना-भाजप कार्यकर्त्यांनी एकत्रितपणे येऊन विधानसभा निवडणुकीला सामोरे जाऊयात, असे आवाहन आमदार किशोर आप्पा पाटील यांनी यावेळी कार्यकर्त्यांना केले.
शिवसेना-भाजप कार्यकर्त्यांसाठी समन्वय बैठक –
पाचोरा येथे विधानसभा निवडणुकीच्या पार्श्वभूमीवर भाजपा शिवसेना प्रमुख पदाधिकारी व कार्यकर्त्यांची समन्वय बैठकीचे आज 23 ऑक्टोबर रोजी दुपारी आयोजन करण्यात आले. त्यावेळी ते बोलत होते. यावेळी खासदार स्मिता वाघ, आमदार मंगेश चव्हाण, भाजपचे जिल्हाध्यक्ष ज्ञानेश्वर महाराज जळकेकर, शिवसेना जिल्हाप्रमुख रावसाहेब दानवे यांच्यासह शिवसेना-भाजपचे पदाधिकारी-कार्यकर्ते उपस्थित होते.
आमदार किशोर आप्पा पाटील यांचा सवाल –
केंद्रीय नेतृत्व म्हणजे गृहमंत्री अमित शहा हे महाराष्ट्रात युती असल्याचे सांगतात. तसेच राज्यातील भाजप प्रदेशाध्यक्ष सांगतात की, जे बंडखोरी करतील त्यांच्यावर कारवाई करू…हकालपट्टी करू. मात्र, मतदारसंघात जे भाजपचे बॅनर वापरून सत्ताधारी आमदारांवर टीका करताएत. मग तुम्ही त्यांच्यावर कारवाई का करत नाही, असा सवालही आमदार किशोर आप्पा पाटील यांनी उपस्थित केला.
दिशाभूल करणाऱ्यांची हकालपटी करण्याची मागणी –
मतदारसंघातील शिवसेना-भाजप कार्यकर्त्यांमधील संभ्रम दूर करावा. तसेच भाजप-शिवसेनेची महायुती असून या महायुतीच्या उमेदवाराच्या पाठीमागे उभे राहून त्यांच्यासाठी काम करावे, असा संदेश तुम्ही त्यांना द्यावा, अशी मागणी आमदार किशोर आप्पा पाटील यांनी खासदार स्मिता वाघ, आमदार मंगेश चव्हाण तसेच जिल्हाध्यक्ष ज्ञानेश्वर महाराज जळकेकर यांच्याकडे केली. तसेच कार्यकर्ते, पक्ष आणि नेत्यांची दिशाभूल करणाऱ्यांची हकालपटी करून आणि भारतीय जनता पार्टीचे विचार पुढे घेऊन जाणाऱ्या एखाद्या प्रामाणिक कार्यकर्त्याला जबाबदारी द्यावी, अशी मागणीही आमदार पाटील यांनी यावेळी केली.
भाजप कार्यकर्त्यांनी व्यक्त केली नाराजी –
आगामी विधानसभा निवडणुकीसाठी शिवसेना-भाजप कार्यकर्त्यांसाठी समन्वय बैठकीचे आयोजन करण्यात आले होते. या बैठकीत सुरूवातीला भाजप कार्यकर्त्यांनी नाराजी व्यक्त केली. मात्र, यानंतर आमदार मंगेश चव्हाण, खासदार स्मिता वाघ तसेच ज्ञानेश्वर महाराज जळकेकर यांनी कार्यकर्त्यांना मार्गदर्शन करत समन्वय घडवून आणण्याचा प्रयत्न केला. तसेच आमदार किशोर आप्पा पाटील यांच्या विजयासाठी सर्वांनी एकत्रित मिळून काम करण्याच्या सूचनाही त्यांनी भाजप कार्यकर्त्यांना दिल्या.
हेही पाहा : शिवसेना प्रमुख पदाधिकारी व कार्यकर्त्यांची समन्वय बैठकीतील आमदार किशोर आप्पा पाटील यांचे संपुर्ण भाषण
