मुंबई, 31 डिसेंबर : राज्यातील महायुती सरकारमधील मंत्र्यांना खातेवाटप जाहीर झाल्यानंतर संबंधित खात्यांचे मंत्री पदभार स्विकरत आहेत. अशातच काल 30 डिसेंबर रोजी राज्याचे शालेय शिक्षण मंत्र्यांनी ज्यापद्धतीने पदभार स्विकारला त्याची राज्यभर चर्चा होत आहे. नाशिकमधील शालेय विद्यार्थ्यांना सहलीच्या माध्यमातून मंत्रालयात नेत त्यांच्या उपस्थितीत दादा भूसे यांनी शालेय शिक्षणमंत्री म्हणून पदभार स्विकारला.
नेमकी बातमी काय? –
शिवसेना शिंदे गटाचे जेष्ठ नेते दादा भूसे यांना महायुती सरकारमध्ये शालेय शिक्षण विभागाची जबाबदारी देण्यात आली आहे. दरम्यान, नाशिक जिल्ह्यातील जिल्हा परिषद, खाजगी संस्था, समाज कल्याण, आदिवासी विकास विभागाच्या शाळेतील 50 विद्यार्थ्यांसोबत ते बसमधून काल मंत्रालयाकडे रवाना झाले. यानंतर या विद्यार्थ्यांच्या उपस्थितीत त्यांनी मंत्रालयात शालेय शिक्षणमंत्री म्हणून पदभार स्विकारला.
मंत्री दादा भूसे यांची प्रतिक्रिया –
शालेय शिक्षणमंत्री म्हणून पदभार स्विकारल्यानंतर दादा भूसे म्हणाले की, विद्यार्थ्यांचे हित हेच आमचे सर्वोच्च प्राधान्य असेल. शिक्षण क्षेत्रात नवनवीन धोरणांची प्रभावी अंमलबजावणी करण्यावर आम्ही लक्ष केंद्रित करू. प्रत्येक विद्यार्थ्याला शिक्षणाच्या समान आणि सुलभ संधी मिळाल्या पाहिजेत. शिक्षणाच्या अभावामुळे कोणताही विद्यार्थी वंचित राहणार नाही, याची खास खबरदारी घेतली जाईल.
दादा भूसे पुढे म्हणाले की, योग्य पद्धतीने काम करून सकारात्मक बदल घडवण्यासाठी कटिबद्ध आहोत. विभागासाठी रोडमॅप निश्चित करून काम सुरू करण्यात येईल. अनेक मागण्या पूर्ण करण्यासाठी आवश्यक निधी उपलब्ध करून दिले जातील. शिक्षण विभागातील सर्व अधिकारी, शिक्षक, ग्रामसेवक आणि कर्मचाऱ्यांसोबत एकजुटीने काम करून विभागाचा सर्वांगीण विकास साधला जाईल. दरम्यान, पालकांकडूनही अपेक्षा आणि सूचना घेत त्या पूर्ण करण्यासाठी प्रयत्न करण्यात येतील. तसेच विद्यार्थ्यांना केंद्रस्थानी ठेवून शिक्षण क्षेत्रामध्ये सुधारणा घडवण्याचा उद्देश आहे असेही मंत्री भूसे यांनी सांगितले. यावेळी राज्यमंत्री पंकज भोयार तसेच संबंधित विभागाचे अधिकारी उपस्थित होते.
हेही पाहा : Success Story : भाऊ-बहिणीची सैन्यदलात निवड; एकाच कुटुंबातील 4 भावंडं देशसेवेसाठी सज्ज
