मुक्ताईनगर : जळगाव जिल्ह्यातील मुक्ताईनगर तालुक्यातील कोथळी गावातील संत मुक्ताईच्या यात्रेत टवाळखोर मुलांनी केंद्रीय मंत्री रक्षा खडसे यांच्या मुलीसह इतर काही मुलींची छेडछाड केल्याचा धक्कादायक प्रकार घडला. या मुलींच्या मनाविरुद्ध काही टवाळखोर मुलांनी फोटोही काढले. ही घटना समोर आल्यानंतर राज्यात एकच खळबळ उडाली. याप्रकरणी मंत्री रक्षा खडसेंनी काल मुक्ताईनगर पोलीस ठाण्यात धाव घेत टवाळखोर मुलांना तातडीने अटक व्हावी, अशी मागणी केली. तसेच यावेळी माध्यमांशी संवाद साधताना महिला व मुलींना महत्त्वाचे आवाहन केले.
माध्यमांशी बोलताना मंत्री रक्षा खडसे म्हणाल्या की, मला हाच प्रश्न पडला आहे की, जर पोलीस आमच्या सुरक्षेसाठी दिलेले असतात आणि कुटुंबाच्या सुरक्षेसाठी त्या गार्डला पाठवलेले आहे, तर कुणाची हिम्मतच नको व्हायला की, ड्रेसमध्ये असताना कुणी पोलिसांवर दादागिरी करू शकतो.
या सर्व गोष्टी अति वाढत आहेत. याला कुठेतरी आळा बसणं गरजेचं आहे. याला पाठबळ कोण देतंय मला माहिती नाही. पण आज मी तुम्हाला सांगते की, जो काही प्रकार झाला, मलाही असं वाटतं की कुठे ना कुठे तरी मीसुद्धा कमी पडले. मीपण आधीपासून या गोष्टींवर लक्ष दिलं पाहिजे होतं. पण इथून पुढे मी तुम्हाला सांगते की, या सर्व गोष्टींवर आम्ही पण बारकाईने नजर ठेऊन.
केंद्रीय मंत्री रक्षा खडसेंचे मुली आणि महिलांना आवाहन –
आज माझ्यासोबत झालं म्हणून मला माहिती पडलं. पण असे कितीतरी महिलांसोबत, मुलींसोबत असे प्रकार घडत असतील आणि आज मी तुमच्या माध्यमातून मुलींना आणि महिलांना आवाहन करते की, आपणही बऱ्याचवेळा की उगाच नाव पेपरमध्ये येईल, मुलीचं नाव पुढे येईल, कुटुंबाचं नाव पुढे येईल म्हणून आपण शांत बसतो. पण त्याचा कुठेही विचार न करता आपल्या मुलीसाठी, घरातील महिलेसाठी कुटुंबातील व्यक्तींनी पुढे आले पाहिजे आणि लहानातल्या लहान घडना जरी असतील तर त्या पोलिसांच्या कानावर घातल्या पाहिजे.
एकदा माझ्याही मनात हा विचार आला. मी जर बोलली नाही तर उद्या या मुक्ताईनगरमध्ये किंवा माझ्या मुलीसोबतही काही घडू शकते. मी राज्य सरकारकडे एवढीच मागणी करेन की, कायदे भरपूर आहेत. पण या अशा प्रवृत्तीच्या लोकांना ताबडतोब यांच्यावर कठोरातील कठोर कारवाई करायला हवी आणि अशा प्रवृत्तीला संपवलं पाहिजे. न्यायालयाच्या माध्यमातूनही अशा आरोपींना जामीन मिळू नये, अशा पद्धतीने यावर कार्यवाही व्हायला हवी.
तसेच आरोपी कुणाच्या जवळचा आहे, ही माहिती घेतली नाही आणि मी असं म्हणते की, तो माझ्याजरी जवळचा असेल किंवा कुणाच्याही जवळचा असेल पण शेवटी मुलींचा आणि महिलांचा याठिकाणी विषय आहे. तो माझ्याजरी जवळचा असेल किंवा कोणत्याही लोकप्रतिनिधीच्या जवळचा असेल तर याचा विचार न करता, ज्याने गुन्हा केलेला आहे, त्याच्यावर कारवाई व्हायला हवी, अशी मागणी मंत्री रक्षा खडसे यांनी केली.
हेही वाचा – संतापजनक! केंद्रीय मंत्री रक्षा खडसेंच्या मुलीची छेडछाड, नेमकं काय घडलं, संपूर्ण घटनाक्रम..
