मुंबई, 7 मार्च : राज्य विधिमंडळाचे अर्थसंकल्पीय अधिवेशन सध्या सुरू आहे. या अधिवेशनात राज्यपालांच्या अभिभाषणावर राज्याचे मुख्यमंत्री देवेंद्र फडणवीस यांनी आज भाषण केले. दरम्यान, यावेळी त्यांनी मुख्यमंत्री युवा कार्य प्रशिक्षण योजनेत पाच महिन्यांची मुदतवाढ देत असल्याची घोषणा केली. तसेच यापुढे आता या मुख्यमंत्री युवा कार्य प्रशिक्षण योजनेतील प्रशिक्षणार्थींना मुदतवाढ मिळणार नाही, त्यांच्या जागी नवीन मुलं प्रशिक्षणासाठी घेतले जातील, असेही मुख्यमंत्री फडणवीस म्हणाले.
देवेंद्र फडणवीसांची घोषणा नेमकी काय? –
विधानसभेत मुख्यमंत्री देवेंद्र फडणवीस म्हणाले की, मुख्यमंत्री युवा कार्य प्रशिक्षण योजनेतील प्रशिक्षणार्थींना पुढील पाच महिन्यांची मुदतवाढ देण्यात येत आहे. तसेच पुढील 11 महिन्यांचा कालावधी त्यांचा पुर्ण करण्यात येणार आहे.
दरम्यान, 11 महिन्यानंतर त्याच प्रशिक्षणार्थ्यांना पुन्हा घ्या, अशी विनंती लोकप्रतिनिधींनी करू नये. कारण, ही कार्य प्रशिक्षण योजना आहे. ही नोकरीची योजना नाही. या योजनेच्या माध्यमातून त्यांच्याकडे सरकारचे प्रमाणपत्र असेल तर त्यांना नोकरीत लाभ होईल. यामुळे 11 महिन्यानंतर मुख्यमंत्री युवा कार्य प्रशिक्षण योजनेच्या माध्यमातून नवीन भरती केली जाणार असल्याची घोषणा देवेंद्र फडणवीस यांनी केली.
मुख्यमंत्री युवा कार्य प्रशिक्षण योजना नेमकी काय? –
एकनाथ शिंदे यांच्या नेतृत्वाखालील सरकारच्या काळात युवकांसाठी राज्य सरकारने मुख्यमंत्री युवा कार्य प्रशिक्षण योजना जाहीर केली. या योजनेनुसार 12 वी उत्तीर्ण विद्यार्थ्यांना 6 हजार, आयटीआय आणि पदविकाधारक विद्यार्थ्यांना 8 हजार तर पदवी उत्तीर्ण असलेल्या विद्यार्थ्यांना 10 हजार रुपये देण्याचा निर्णय घेण्यात आला. या योजनेच्या माध्यमातून विद्यार्थ्यांना अप्रेंटिस तत्वावर भरती करून घेत प्रशिक्षण दिले जाते. दरम्यान, आता पुन्हा एकदा मुख्यमंत्री युवा कार्य प्रशिक्षण योजनेतील प्रशिक्षणार्थ्यांसाठी मुदतवाढीची मागणी केली जात होती. यामुळे पाच महिन्यांची मुदतवाढ देत असल्याचे मुख्यमंत्री देवेंद्र फडणवीस यांनी जाहीर केले आहे.
