मुंबई, 7 मार्च : महाराष्ट्र विधिमंडळाच्या अर्थसंकल्पीय अधिवेशन सध्या सुरू आहे. या अधिवशेनात विरोधक तसेच सत्ताधारी आमदारांकडून निवडणुकीच्या काळात लाडक्या बहिणींना 2100 रुपयांचा हप्ता देण्यात आलेले आश्वासन पुर्ण करण्यात यावे, अशी मागणी सरकारकडे केली जातेय. यावर राज्याच्या महिला व बालविकास मंत्री आदिती तटकरे यांनी विधानसभेत स्पष्ठीकरण दिलंय.
मंत्री आदिती तटकरे काय म्हणाल्या? –
मंत्री आदिती तटकरे म्हणाल्या की, ‘मुख्यमंत्री माझी लाडकी बहीण योजना’ पुढच्या कालावधीमध्येही यशस्वीरित्या राबवण्याचे आणि चालू ठेवण्याची शासनाची भूमिका आहे. पात्र लाभार्थी महिलांवर अन्याय होऊ देणार नाही. दरम्यान, लाडक्या बहिणींना 2100 रुपयांचा हप्ता देण्याबाबत योग्य तो निर्णय घेतला जाईल, अशी ग्वाही मंत्री आदिती तटकरे यांनी विधानसभेत विभागाच्या पुरवणी मागण्यांवरील चर्चेला उत्तर देताना दिली.
अंगणवाडी सेविका आणि मदतनीस यांच्या मानधनात वाढ –
मंत्री आदिती तटकरे पुढे म्हणाल्या की, मागणीनुसार व आवश्यकतेप्रमाणे राज्यात स्मार्ट अंगणवाड्यांची निर्मिती करण्यासाठी शासन कटिबद्ध आहे. बाल संगोपन योजनेचा लाभ पात्र लाभार्थ्यांपर्यंत देण्यात येईल. भिक्षेकरी गृहांच्या दुरुस्तीसाठी निधीची उपलब्धता करून देण्यात येईल. अंगणवाडी सेविका आणि मदतनीस यांचे मानधन 5000 रुपयांनी वाढविण्यात आले आहे. आजपर्यंत ही सर्वात मोठी मानधन वाढ आहे. दरम्यान, अंगणवाडी सेविका आणि मदतनीस यांना सक्षम करण्यासाठी शासन कटिबद्ध असल्याचे तटकरे यांनी सांगितले.
नियमानुसार उपाययोजना करण्यात येतील –
अंगणवाडी इमारतींच्या दुरुस्तीसाठी लागणारा निधी उपलब्ध करून देण्यात येईल. अनाथ बालकांच्या पुनर्वसनाबाबत प्रक्रिया सुरळीत करण्याच्या दृष्टिकोनातून नियमानुसार उपाययोजना करण्यात येतील. गर्भाशय मुखाच्या कर्करोग लसीकरणाबाबत आरोग्य विभागासोबत समन्वय साधून उपयुक्त असा उपक्रम पुढच्या कालावधीमध्ये निश्चितपणाने शासन राबविणार असल्याची माहितीही मंत्री आदिती तटकरे यांनी दिली.
हेही वाचा : Meghna Bordikar : कॅन्सर रुग्णांसाठी आरोग्य राज्यमंत्री मेघना बोर्डीकरांनी विधानसभेत दिली महत्त्वाची माहिती
