धुळे : गेल्या काही दिवसात बलात्कार, आत्महत्या तसेच आर्थिक फसवणुकीच्या घटना मोठ्या प्रमाणात समोर येत आहेत. घरघुती हिंसाचाराच्याही घटनांमध्ये वाढ झाल्याचे दिसून येत आहे. यातच आणखी एक धक्कादायक घटना समोर आली आहे. पोलीस दाम्पत्यात वाद झाला. या वादातून पोलीस पत्नीने गळफास घेत आत्महत्या केली.
भावना दीपक चौधरी असे मृत महिलेचे नाव होते. भावना चौधरी या महाराष्ट्र पोलीस कर्मचारी होत्या. तर त्यांचे पती दीपक चौधरी हेसुद्धा महाराष्ट्र पोसीस दलात कार्यरत असून धुळे येथील पश्चिम देवपूर पोलीस ठाण्यात कार्यरत आहे. या घटनेमुळे मोठी खळबळ उडाली आहे.
काय आहे संपूर्ण घटना –
पतीच्या जाचाला कंटाळून भावना चौधरी यांनी राहत्या घरात गळफास घेत आत्महत्या केली. गुरुवारी रात्रीच्या सुमारास ही घटना घडली. भावना दीपक चौधरी या चाळीसगाव रोड पोलिस ठाण्यात कार्यरत होत्या. याप्रकरणी पोलिसांनी मृत पोलीस महिलेच्या पतीला तत्काळ अटक केली आहे. मृत महिला पोलीस भावना चौधरी यांच्या आई विद्याबाई कल्लू जेधे (वय-54, रा. धुळे) यांनी याप्रकरणी पश्चिम देवपूर पोलीस स्टेशनला फिर्याद दाखल केली.
फिर्यादीत त्यांनी म्हटले की, भावना दीपक चौधरी (वय-30) या पती दीपक याच्यासोबत देवपुरातील छत्रपती नगरात राहत होत्या. 2019 मध्ये त्यांचा विवाह झाल्यापासून दीपक याने भावना यांचा छळ केला. या सततच्या जाचाला कंटाळून भावना यांनी 13 रोजी राहत्या घरात रात्री अकराच्या सुमारास गळफास घेऊन आत्महत्या केली.
दरम्यान, मृत महिलेच्या आईच्या फिर्यादीवरुन या प्रकरणी पश्चिम देवपूर पोलिसांनी दीपक चौधरी याच्याविरुद्ध पत्नीला आत्महत्येस प्रवृत्त केल्याप्रकरणी गुन्हा दाखल करून त्याला अटक केली आहे. याप्रकरणी पोलीस पुढील तपास करत आहेत.
हेही वाचा – घरकुलांना मोफत वाळू मिळणार, मंत्री चंद्रशेखर बावनकुळेंनी दिली महत्त्वाची माहिती, नेमकं काय म्हणाले?
