मुंबई, 18 मार्च : राज्यात औरंगजेबाच्या कबरीवरून वातावरण तापले असताना काँग्रेस प्रदेशाध्यक्ष हर्षवर्धन सपकाळ यांनी मुख्यमंत्री हे औरंगजेबासारखे क्रूर प्रशासक आहेत, अशी टीका केली होती. यावरून राज्याचे उपमुख्यमंत्री एकनाथ शिंदे यांनी विधानसभेत आक्रमक होत, सपकाळ यांच्या टीकेला जोरदार प्रत्युत्तर दिले आहे.
उपमुख्यमंत्री एकनाथ शिंदे काय म्हणाले? –
विधानसभेत बोलताना उपमुख्यमंत्री एकनाथ शिंदे आज म्हणाले की, काँग्रेसच्या प्रदेशाध्यक्षांनी मुख्यमंत्री देवेंद्र फडणवीस यांची औरंगजेबाशी तुलना करत मुख्यमंत्री हे क्रूर प्रशासक असल्याचे म्हटले. खरंतर, मुख्यमंत्र्यांमध्ये कुठला क्रूरपणा त्यांना दिसला, त्यांनी काय केलं?…त्यांनी का कुणाचे डोळे काढलेत का?….त्यांनी तुमची जीभ छाटली का? त्यांनी काय कुणाची कातडी सोलली का?…नखे काढलीत? काय बोलयचं आणि कुणाची तुलना कुणासोबत करायची.
म्हणून औरंगजेबाचं उदात्तीकरण करण्याचे काम थांबलं पाहिजे. ज्यांनी उदात्तीकरण केलंय..त्यांना निलंबित करण्याचं काम सरकारने केलं असून त्यांच्यावर गुन्हा दाखल झालाय. दरम्यान, औरंगजेबाचे उदात्तीकरण करणे हा देखील देशद्रोहचं असल्याचेही उपमुख्यमंत्री शिंदे म्हणाले. यावेळी विरोधकांनी गदारोळ केल्यामुळे उपमुख्यमंत्री एकनाथ शिंदे यांनी आक्रमक होत विरोधकांना जोरदार प्रत्युत्तर दिले.
काँग्रेस प्रदेशाध्यक्ष हर्षवर्धन सपकाळ काय म्हणाले होते? –
गेल्या दोन दिवसांपुर्वी काँग्रेस प्रदेशाध्यक्ष हर्षवर्धन सपकाळ यांनी मुख्यमंत्री देवेंद्र फडणवीसांची तुलना औरंगजेबासोबत करत वादग्रस्त वक्तव्य केलं होते. औरंगजेब हा क्रूर शासक होता आणि देवेंद्र फडणवीस देखील तेवढेच क्रूर आहेत. ते धर्माचा आधार घेत असून औरंगजेबाची कबर उचलून टाका, असे ते सांगत आहेत. यामुळे याचा अर्थ त्यांना मराठी माणसांचा, मावळ्यांचा आणि शिवाजी महाराजांचा इतिहास पुसून टाकायचा आहे. मात्र, औरंगजेबाची कबर ही शिवाजी महाराज यांच्या इतिहासाची साक्ष असल्याचे सपकाळ म्हणाले होते.
दरम्यान, काँग्रेस प्रदेशाध्यक्ष हर्षवर्धन सपकाळ यांच्या वादग्रस्त वक्तव्याचे पडसाद अधिवेशनात उमटले आणि आज एकनाथ शिंदे यांनी विरोधकांना प्रत्युत्तर दिले.
हेही पाहा : Video : “ए शेर का बच्चा है, खुलेआम किया! आप मै हिम्मत है?”, DCM Eknath Shinde आक्रमक
