वरणगाव (जळगाव) : मंत्री गिरीश महाजन यांच्या डोक्याला दुखापत झाल्याची घटना समोर आली आहे. देशसेवा बजावत असताना वीरमरण आलेल्या वरणगाव येथील अर्जुन बाविस्कर यांच्या पार्थिवाचे दर्शन घेताना ही घटना घडली. यावेळी मंत्री गिरीश महाजन यांच्या डोक्याला लोखंडी रॉड लागल्याने ही दुखापत झाली.
काय आहे संपूर्ण घटना –
दुखापतीच्या या घटनेनंतर जखमी अवस्थेतच मंत्री गिरीश महाजन यांना वरणगाव येथील निमजाय हॉस्पिटल येथे नेण्यात आले. याठिकाणी त्यांनी प्राथमिक उपचार घेतल्यानंतर ते वीर जवान अर्जुन बाविस्कर यांच्या अंत्ययात्रेत सहभागी झाले. त्यानंतर, महत्त्वाच्या बैठकीमुळे ते पुढे नाशिककडे रवाना झाले.
जळगाव जिल्ह्यातील वरणगाव येथील जवान नायक अर्जुन लक्ष्मण बावस्कर यांना आसाम-अरुणाचल सीमेवर देशाचे रक्षण करत असताना वीरमरण आले. आज त्यांच्यावर वरणगांव येथे शासकीय इतमामात अंत्यसंस्कार करण्यात आले. वीर जवान अर्जुन लक्ष्मण बावस्कर यांना मानवंदना देण्यासाठी जलसंपदा मंत्री गिरीश महाजन हे आज वरणगाव शहरात आले होते. यावेळी वीर जवान अर्जुन बाविस्कर यांच्या पार्थिवाचे दर्शन घेण्यासाठी मिल्ट्रीच्या ट्रॅकमध्ये चढले असताना ट्रॅकचा वरचा लोखंडी रॉड त्यांच्या डोक्याला लागला. त्यानंतर, डोक्यातून रक्तस्राव होत असताना गिरीश महाजन यांनी वीर जवान अर्जुन बाविस्कर यांच्या पार्थिव देहाला पुष्पचक्र अर्पण करत अभिवादन केले. मात्र, त्यांच्या डोक्याचे रक्त थांबत नसल्याने त्याठिकाणी उपस्थित असलेल्या माजी नगराध्यक्ष सुनील काळे, कामगार नेते मिलिंद मेढे, भाजपा शहराध्यक्ष सुनील माळी, शेख आखलाक यांनी मंत्री गिरीश महाजन यांना आग्रह करुन प्राथमिक उपचारासाठी तातडीने जवळील हॉस्पिटलमध्ये नेले. रुग्णालयात डॉ. निलेश पाटील यांनी त्यांच्यावर उपचार केले.
त्यानंतर, गिरीश महाजन यांनी वीर जवान अर्जुन बाविस्कर यांच्या परिवाराला भेट दिली आणि काळजी करू नका देशसेवा करीत असतांना अर्जुनला वीर मरण आले याचे दुःख आमच्या मनात आहे. मात्र, मी व राज्य सरकार बाविस्कर परिवाराच्या दुःखात सहभागी आहे, या शब्दात सांत्वन केले.
डोक्याला मार लागलेला असतानाही अंत्ययात्रेत सहभागी –
मंत्री गिरीश महाजन यांच्या डोक्याला मार लागल्यावरही ते पुढे अंत्ययात्रेत तिरंगा सर्कलपर्यंत चालत गेले. तसेच तिथे हजारो वरणगावकरांच्या उपस्थित त्यांनी वीर जवान यांना मानवंदना दिली, त्यानंतर नाशिक येथे महत्वाची बैठक असल्याने मंत्री गिरीश महाजन नाशिककडे वाहनाने रवाना झाले.
