जळगाव : 15 हजार रुपयांची लाच घेताना परिषदेतील अतिरिक्त जिल्हा आरोग्य अधिकारी यांना रंगेहाथ पकडण्यात आले आहे. डॉ. जयवंत जुलाल मोरे, (वय 46) असे लाचखोर जळगाव जिल्हा परिषदेतील अतिरिक्त जिल्हा आरोग्य अधिकाऱ्याचं नाव आहे.
नेमकं काय प्रकरण –
तक्रारदार हे जिल्हा प्रशिक्षण केंद्र, जिल्हा परिषद जळगाव येथे वैद्यकीय अधिकारी आहेत. त्यांची सेवांतर्गत पदव्युत्तर पदवी अभ्यासक्रमासाठी पालघर येथे प्रतिनियुक्ती झालेली आहे. त्यांना प्रतिनियुक्तीचे ठिकाणी कार्यमुक्त करण्यासाठीचा प्रस्ताव डॉ. सचिन भायकर, जिल्हा आरोग्य अधिकारी यांचे मार्फतीने मुख्य कार्यकारी अधिकारी, जिल्हा परिषद जळगाव यांना सादर करण्यासाठी अतिरिक्त जिल्हा आरोग्य अधिकारी डॉ. जयवंत जुलाल मोरे यांनी डॉ. सचिन भायकर, जिल्हा आरोग्य अधिकारी यांचे नावे 30 हजार रुपयांची लाच मागितली. यानंतर तडजोडीअंती 15 हजार रुपये देण्याचे ठरले.
याप्रकरणी तक्रारदाराने काल 3 एप्रिल रोजी जळगाव लाचलुचपत प्रतिबंधक विभागाकडे तक्रार केली. यानंतर आज लाचलुचपत प्रतिबंधक विभागाने सापळा रचून 15 हजार रुपयांची लाच स्विकारताना रंगेहाथ पकडले. याप्रकरणी अतिरिक्त जिल्हा आरोग्य अधिकारी डॉ. जयवंत जुलाल मोरे यांच्यावर जळगाव शहर पोलीस ठाणे येथे गुन्हा दाखल करण्याची प्रक्रिया सुरू आहे. ही कार्यवाही पर्यवेक्षण अधिकारी पोलीस उप अधीक्षक (लाचलुचपत प्रतिबंधक विभाग, जळगांव) योगेश ठाकूर यांच्यासह पोलीस निरीक्षक नेत्रा जाधव, Hc महाजन, PC सूर्यवंशी, चालक Psi सुरेश पाटील यांनी केली.
हेही पाहा – JMFC Results : शेतकरी कुटुंबातील ऋषिकेश बनला पाचोरा तालुक्यातील पहिला न्यायाधीश | Success Story
