नाशिक, 19 एप्रिल : राज्यात गुन्हेगारीच्या वेगवेगळ्या घटना समोर येत असतानाच एक खळबळजनक बातमी समोर आलीय. साखरपुड्यात होणाऱ्या पत्नीने प्रियकराला मिठी मारल्याने तसेच नियोजित वधूकडून, लग्न कर, नाही तर खोट्या पोलिस केसमध्ये अडकवण्याची सातत्याने धमक्या दिल्याने नाशिकमध्ये आयकर अधिकाऱ्याने आत्महत्या केल्याचे उघडकीस आले. नाशिकमधील अंबड पोलीस ठाण्याच्या हद्दीत ही घटना घडली असून हरेकृष्ण पाण्डेय (रा. देवरिया, उत्तर प्रदेश) असे मयत अधिकाऱ्याचे नाव आहे.
नेमकी बातमी काय? –
नाशिकमधील बुरकुले मंगल कार्यालयाजवळील इन्कम टॅक्स कॉलनीत हा प्रकार उघडकीस आला. हरेराम पाण्डेय (रा. देवरिया, उत्तर प्रदेश) यांनी दिलेल्या तक्रारीनुसार, हरेकृष्ण पाण्डेय हे नाशिकमध्ये आयकर विभागात कार्यरत होते. असे असताना त्यांचा वाराणसी येथील मोहिनी नामक मुलीशी साखरपुडा झाला होता. या कार्यक्रमात मोहिनीने तिचा प्रियकर सुरेश पाण्डेय याला मिठी मारली होती. दरम्यान, तिचे प्रेमसंबंध हरेकृष्णला कळल्यानंतर प्रियकराला सोडून देण्याचे होणाऱ्या पत्नीला सांगितले.
अन् उचललं टोकाचं पाऊल –
मात्र, तिने मी त्याला सोडणार नाही आणि तू जर माझ्यासोबत लग्र केले नाही तर तुझ्यासह कुटुंबीयांवर हुंडा मागितल्याची तक्रार दाखल करेल. अशी धमकी आयकर अधिकारी हरेकृष्णला दिली होती. दरम्यान, हरेकृष्ण वैफल्यग्रस्त झाला होता. त्यातून त्याने राहत्या घरी गळफास घेत आपली जीवनयात्रा संपवली.
तिघांविरोधात गुन्हा दाखल –
याप्रकरणी नाशिकमधील अंबड पोलिसांत मोहिनी पांडे, तिचा प्रियकर सुरेश पांडे आणि त्याचा साथीदार मुनेंद्र पांडे या तिघांविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे. सध्या हे तिघेही फरार झाल्याचे समजते. पुढील तपास अंबड पोलीस ठाण्याचे वरिष्ठ पोलीस निरीक्षक राकेश हांडे यांच्या मार्गदर्शनाखाली तपास सुरू आहे. तर दुसरीकडे हरेकृष्ण पाण्डेय यांचा शुक्रवारी 18 एप्रिल रोजी वाराणसी येथे विवाह होणार होता. मात्र, लग्न होण्यापूर्वीच त्यांनी आपली जीवन यात्रा संपवल्याने इन्कमटॅक्स विभागात हळहळ व्यक्त केली जात आहे.
