परधाडे (पाचोरा), 6 मे : पाचोरा शहर ते परधाडे रेल्वे स्थानका दरम्यान खंबा क्रमांक 396/19 जवळ पुरूष, महिला तसेच चार वर्षीय मुलगा अशा तीन जणांचा मृतदेह काल 5 मे रोजी रात्री 10 वाजेच्या सुमारास आढळून आल्याची खळबळजनक घटना समोर आली होती. दरम्यान, आता या घटनेबाबत धक्कादायक माहिती समोर आली आहे. 25 वर्षीय पुरूष आणि महिलेने चार वर्षीय मुलासोबत रेल्वे रूळावर आत्महत्या केली असून राजू निंबा मोरे (वय 25 रा. भातखंडे खुर्द), राधिका ठाकरे (वय 25 रा. बारामती) तसेच सारंग ठाकरे (वय 4 वर्ष) असे मयतांचे नाव आहे.
नेमकी घटना काय? –
मिळालेल्या माहितीनुसार, राजू मोरे आणि राधिका ठाकरे हे या आधी दोघे विवाहित होते. असे असताना त्या दोघांची इन्स्टाग्रामवर ओळख झाली आणि ते दोघं एकमेकांच्या प्रेमात पडले. दरम्यान, राधिका ठाकरे हिला पहिल्या पतीपासून सारंग हा चार वर्षांचा मुलगा होता. दरम्यान, त्या मुलाला सोबत घेत तिने बारामतीहून इकडे येत राजू मोरेसोबत राहण्याचा निर्णय घेतला. यानंतर भातखंडे येथे काही दिवस राहिले. मात्र, घरच्यांचा दुसऱ्या लग्नाला विरोध होता. अशातच राजू मोरे आणि राधिका ठाकरे या दोघांनी मुलगा सारंगसह आत्महत्या करण्याचा टोकाचा निर्णय घेतला.
दरम्यान, पाचोरा ते परधाडे रेल्वे स्थानका दरम्यान काल 5 मे रोजी रात्री 10 वाजेच्या सुमारास त्यांची मृतदेह आढळून आली. याप्रकरणाची माहिती रेल्वे पोलिसांनी पाचोरा पोलिसांनी दिली असता सहायक पोलीस निरीक्षक दिनेश भदाणे, पोलीस उपनिरीक्षक योगेश गणगे, हेड कॉन्स्टेबल राहुल शिंपी, मनोहर पाटील, अशोक हटकर, समाधान भोसले आदी कर्मचाऱ्यांनी घटनास्थळी जाऊन पंचनामा केला. यावेळी मृतदेह स्थानिक नागरिकांच्या मदतीने पाचोरा ग्रामीण रूग्णालयात हलविण्यात आले. दरम्यान, याप्रकरणाचा पुढील तपास पाचोरा पोलीस करित आहेत.
हेही वाचा : स्थानिक स्वराज्य संस्थांच्या निवडणुकींचा मार्ग मोकळा; सुप्रिम कोर्टाचे राज्य सरकारला नेमके आदेश काय?
