ईसा तडवी, प्रतिनिधी
पाचोरा, 25 जून : जळगाव जिल्ह्यातील पाचोरा येथून धक्कादायक बातमी समोर आली आहे. पाचोरा शहरात असलेल्या एका शाळेत शिक्षकाने टोकाचे पाऊल उचलत गळफास घेत आत्महत्या केलीय. शाळेतील चौथ्या मजल्यावरील एका खोलीत आत्महत्या केल्याचे आज 25 जून रोजी सकाळी दहा वाजेच्या सुमारास उघडकीस आले. रविंद्र भारत महाले (वय 43 रा. दहिगाव संत ता. पाचोरा) असे या शिक्षकाचे नाव आहे. दरम्यान, या घटनेने संपूर्ण परिसरात खळबळ उडाली असून पुढील तपास पाचोरा पोलीस करत आहेत.
नेमकं काय घडलं? –
मिळालेल्या माहितीनुसार, रविंद्र भारत महाले हे यांचं मूळगाव पाचोरा तालुक्यातील दहिगाव संत हे होतं. ते सध्या पाचोरा शहरात ते वास्तव्यात होते आणि पाचोरा शहरातील एका शाळेत गेल्या 20 वर्षांपासून ते शिक्षक म्हणून कार्यरत होते. दरम्यान, आज सकाळी दहा वाजेच्या वाजेच्या सुमारास रविंद्र महाले यांनी शाळेतील एका वर्गखोलीत गळफास घेतल्याचे प्राथमिक तपासात स्पष्ट झाले आहे.
घटनेची माहिती समजताच शाळेतील कर्मचाऱ्यांनी तात्काळ पोलीस प्रशासनाला माहिती दिली. यानंतर पाचोरा पोलिसांनी घटनास्थळी भेट देत सदर घटनेचा पंचनामा केला. पीटीसी चेअरमन संजय वाघ यांनी देखील घटनास्थळी तात्काळ धाव घेतली. दरम्यान, आत्महत्येचं नेमकं कारण स्पष्ट झालेलं नसून मृतदेह उत्तरीय तपासणीसाठी पाचोरा ग्रामीण रूग्णालयात पाठवण्यात आला आहे.
आत्महत्येचं कारण अस्पष्ठ? –
याप्रकरणी पाचोरा पोलिसांत अकस्मात मृत्यूची नोंद करण्यात आली असून पोलीस पुढील तपास करत आहेत. दरम्यान, शिक्षकाने शाळेत आत्महत्या केल्याने आत्महत्येचे कारण अद्याप अस्पष्ठ आहे. मात्र, या दुर्दैवी घटनेमुळे परिसरात हळहळ व्यक्त केली जात असून, विद्यार्थ्यी तसेच सहकारी शिक्षकांमध्ये शोककळा पसरली आहे.
