मुंबई, 14 ऑक्टोबर : जळगाव जिल्ह्यातील अमळनेर विधानसभा मतदारसंघाचे माजी आमदार शिरीष चौधरी यांनी आज 14 ऑक्टोबर रोजी शिवसेना (शिंदे गट) पक्षात जाहीर प्रवेश केला. यावेळी त्यांच्यासह अमळनेरमधील अनेक जिल्हा परिषद आणि पंचायत समिती सदस्यांनीही शिवसेनेमध्ये पक्षप्रवेश केला. उपमुख्यमंत्री एकनाथ शिंदे यांच्या हस्ते हा पक्षप्रवेश सोहळा पार पडला.
यांनी केला पक्षप्रवेश –
यावेळी शिरीष चौधरी यांच्यासह उबाठा गटाचे अमळनेरचे माजी नगरसेवक गुलाब पाटील, माजी शहरप्रमुख प्रवीण पाठक, माजी प्रभारी नगराध्यक्ष अनिल महाजन, माजी सभापती श्रीराम चौधरी, माजी सभापती देविदास महाजन, माजी नगरसेवक पंकज चौधरी, महेश जाधव, किरण बागुल, बाळासाहेब संघनाशिव, साखरलाल महाजन आणि इतर असंख्य पदाधिकाऱ्यांनी हाती भगवा घेत शिंदेच्या शिवसेनेमध्ये प्रवेश केला.
यांची होती उपस्थिती –
याप्रसंगी पाणीपुरवठा मंत्री गुलाबराव पाटील, परिवहन मंत्री प्रताप सरनाईक, रोजगार हमी मंत्री भरतशेठ गोगावले, जलसंधारण मंत्री संजय राठोड, आमदार संतोष बांगर, आमदार किशोर आप्पा पाटील, आमदार अमोल पाटील, आमदार चंद्रकांत सूर्यवंशी, माजी आमदार रवींद्र फाटक, शिवसेना सचिव संजय मोरे तसेच शिवसेना पदाधिकारी आणि शिवसैनिक मोठ्या संख्येने उपस्थित होते.
अमळनेरात वाढणार राजकीय चूरस –
शिरीष चौधरी यांनी 2014 साली अपक्ष निवडणूक लढवत अमळनेर मतदारसंघातून विजय मिळवला होता. त्यानंतर त्यांनी भारतीय जनता पक्षाला समर्थन दिलं होतं. तसेच मागील काही वर्षांपासून ते भाजपात सक्रिय होते. दरम्यान, 2024 साली महायुतीच्या जागावाटपात अमळनेर विधानसभेची जागा राष्ट्रवादी काँग्रेस पक्षाकडे आल्याने विद्यमान आमदार अनिल पाटील यांच्याविरोधात शिरीष चौधरी यांनी अपक्ष निवडणूक लढवली आणि यामध्ये त्यांचा पराभव झाला. दरम्यान, आता स्थानिक स्वराज्य संस्थांच्या निवडणुकीच्या पार्श्वभूमीवर त्यांनी शिंदेंच्या शिवसेनेत प्रवेश केल्याने अमळनेर विधानसभा मतदारसंघात राजकीय चूरस वाढणार असल्याचे बोलले जात आहे.
