ईसा तडवी, प्रतिनिधी
पाचोरा, 30 नोव्हेंबर : पाचोरा-भडगाव मतदारसंघात शिवसेना विरूद्ध भाजप असा राजकीय आखाडा रंगत असून आज रविवार रोजी पाचोऱ्यात प्रचाराचा ‘सुपर संडे’ पाहायला मिळणार आहे. पाचोऱ्यात नगराध्यक्ष तसेच नगसेवकपदाच्या उमेदवारांच्या प्रचारासाठी भाजपकडून मंत्री गिरीश महाजन यांची तर शिवसेनेकडून मंत्री गुलाबराव पाटील यांची सभा आज पार पडणार आहे.
पाचोऱ्यात मंत्री गिरीश महाजन यांची सभा –
राज्याचे आपत्ती व्यवस्थापन मंत्री तथा भाजप नेते मंत्री गिरीश महाजन यांची आज पाचोऱ्यात जाहीर सभा पार पडणार आहे. पाचोरा शहरातील मानसिंगका मैदानावर दुपारी 3 वाजता मंत्री महाजन यांच्या सभेचे आयोजन करण्यात आलंय. या सभेत मंत्री संजय सावकारे, खासदार स्मिताताई वाघ, आमदार मंगेश चव्हाण हे देखील उपस्थित राहणार आहेत. माजी आमदार दिलीप वाघ यांच्या पत्नी सुचेताताई वाघ तसेच नगरसेवक पदासाठीच्या भाजप उमेदवारांच्या प्रचारासाठी ही सभा पडणार आहे.
पाचोऱ्यात मंत्री गुलाबराव पाटील यांची सभा –
राज्याचे पाणीपुरवठा मंत्री तथा शिवसेना नेते गुलाबराव पाटील यांची आज पाचोऱ्यात जाहीर सभा पार पडणार आहे. पाचोरा शहरातील भारत डेअरी कृष्णापुरी येथे संध्याकाळी 7.30 वाजता ही सभा पार पडणार आहे. आमदार किशोर आप्पा पाटील यांच्या पत्नी सुनिताताई पाटील तसेच नगरसेवक पदासाठीच्या शिवसेना उमेदवारांच्या प्रचारासाठी ही सभा पडणार आहे.
सुनिताताई पाटील विरूद्ध सुचेताताई वाघ यांच्यात थेट लढत –
पाचोरा-भडगावचे आमदार किशोर आप्पा पाटील यांच्या पत्नी सुनिताताई पाटील यांनी पाचोरा नगरपरिषदेचे नगराध्यक्ष पद भूषवले असून त्या पुन्हा एकदा निवडणुकीच्या रिंगणात आहेत. आमदार किशोर आप्पा पाटील यांनी स्वबळाची घोषणा केली असल्याने पाचोरा आणि भडगावध्ये त्यांच्या नेतृत्वात शिवसेना स्वबळावर निवडणूक लढवत आहे.
तर दुसरीकडे भाजपकडून नगराध्यपदासाठी माजी आमदार दिलीप वाघ यांच्या पत्नी सुचेताताई वाघ यांना उमेदवारी मिळाली असून त्यांनी देखील उमेदवारी अर्ज दाखल केलाय. दरम्यान, पाचोरा नगरपरिषद निवडणुकीत नगराध्यक्षपदासाठी सुनिताताई पाटील विरूद्ध सुचेताताई वाघ अशी थेट लढत होणार असल्याचे चित्र सध्यास्थितीत दिसून येत आहे.
हेही वाचा : अत्यंत दुःखद घटना! जळगावच्या दाम्पत्याचा अपघाती मृत्यू; आज डोकलखेडा येथे अंत्यसंस्कार
