गोवा, 7 डिसेंबर : गोव्यातून एक अत्यंत धक्कादायक घटना समोर आली आहे. काल शनिवारी रात्री उशिरा गोव्यातील एका नाइट क्लबमध्ये भीषण आग लागल्याने कमीत कमी 25 जणांचा मृत्यू झाला आहे. सिलेंडरच्या स्फोटाने ही आग लागल्याचा संशय पोलिसांनी व्यक्त केला आहे.
नेमकी काय आहे संपूर्ण घटना –
उत्तरी गोव्याच्या अर्पोरा परिसरातील एका नाईट क्लबमध्ये ही आगीची दुर्घटना घडली. मृतांमध्ये काही पर्यटकांचाही समावेश आहे. तसेच मृतांमध्ये बहुतांश याच क्लबमधील कर्मचारी असल्याचेही सांगितले जात आहे. मृतांमध्ये 3 महिलांचाही समावेश आहे. दरम्यान, या दुर्घटनेनंतर पंतप्रधान नरेंद्र मोदी, गृहमंत्री अमित शाह आणि राष्ट्रपती द्रौपदी मुर्मू यांनीही दु:ख व्यक्त केले आहे.
गोव्याचे डीजीपी आलोक कुमार यांनी सांगितले की, अर्पोरामध्ये एक दुर्घटना घडली. काल शनिवारी रात्री 12 वाजून 4 मिनिटांच्या सुमारास पोलीस कंट्रोल रुमला आग लागल्याची माहिती मिळाली. यानंतर अग्निशमन दल आणि रुग्णवाहिका तात्काळ घटनास्थळी पोहोचल्या. आग आटोक्यात आणण्यात आली आहे आणि मृतदेह बाहेर काढण्यात आले आहेत. बहुतांश मृतदेह हे किचनमध्ये आढळले आहेत. याबाबत आग लागण्याची कारणे शोधली जातील, त्याबाबत तपास केला जाईल आणि शेवटी जो कुणी दोषी असेल, त्यावर कार्यवाही केली जाईल.
पंतप्रधान नरेंद्र मोदी यांनी एक्सवर लिहिले की, “गोव्यातील अर्पोरा येथील दुर्घटनेमुळे खूप दुःख झाले आहे. ज्यांनी आपल्या प्रियजनांना गमावले त्यांच्याबद्दल माझ्या संवेदना आहेत. जखमी लवकर बरे व्हावेत यासाठी मी प्रार्थना करतो. मी गोव्याचे मुख्यमंत्री डॉ. प्रमोद सावंत यांच्याशी परिस्थितीबद्दल बोललो आहे. राज्य सरकार बाधितांना सर्वतोपरी मदत करत आहे.” तर या घटनेत मृत आणि जखमी झालेल्यांसाठी पंतप्रधान कार्यालयाने मदत जाहीर केली आहे.
गोव्यातील अर्पोरा येथे झालेल्या अपघातात मृत्युमुखी पडलेल्यांच्या नातेवाईकांना पंतप्रधान राष्ट्रीय मदत निधीतून प्रत्येकी 2 लाख रुपये आणि जखमींना प्रत्येकी 50 हजार रुपये दिले जातील, अशी माहितीही पंतप्रधान नरेंद्र मोदी यांनी एक्सवर दिली.
