विमान अपघातात अजित पवार यांच्यासह पाच जणांचा मृत्यू; अपघात झालेल्या विमानात कोण-कोण होतं?

बारामती, 28 जानेवारी : बारामती विमानतळाजवळ झालेल्या भीषण विमान अपघातात राज्याचे उपमुख्यमंत्री अजित पवार यांचे निधन झाले आहे. जिल्हा परिषद आणि पंचायत समिती निवडणुकांच्या प्रचारासाठी त्यांची आज बारामतीत सभा होणार होती. त्या सभेसाठी ते सकाळी मुंबईहून विमानाने बारामतीकडे येत होते. मात्र, विमान बारामती विमानतळावर उतरत असताना अपघात झाला आणि ते जवळच्या शेतात कोसळले. या अपघातात अजित पवार यांच्यासह एकूण पाच जणांचा जागीच मृत्यू झाला आहे. या घटनेत पाच जणांचा मृत्यू झाल्याची माहिती डीजीसीएने अधिकृतपणे दिली आहे. दरम्यान, अजित पवारांच्या निधनाने पवार कुटुंबियांसह संपुर्ण महाराष्ट्रावर शोककाळी पसरली आहे.

महाराष्ट्राचं दादा नेतृत्व हरपलं –

राज्याचे उपमुख्यमंत्री अजित पवार हे काल मंत्रालयीन कामासाठी मुंबईत होते. राज्यात 12 जिल्हा परिषदांच्या निवडणुकीसाठी सुरू असलेल्या प्रचाराच्या पार्श्वभूमीवर आज मुंबईवरून सकाळी 8 वाजून 10 मिनिटांनी ते बारामतीसाठी रवाना झाले होते. बारामतीत पोहचण्यासाठी पाच मिनिटांचा वेळ उरला असतानाचा सकाळी पावणे नऊ वाजेच्या सुमारास त्यांच्या विमानाचा अपघात झाला. यामध्ये अजित पवार यांच्यासह पाच जणांचा दुर्दैवी मृत्यू झाला. दरम्यान, महाराष्ट्राचं दादा नेतृत्त्व आज हरपल्याच्या भावना आता व्यक्त केल्या जात आहेत.

विमान अपघात कसा झाला? –

आतापर्यंतच्या प्राथमिक माहितीनुसार, अजित पवार खासगी VSR कंपनीच्या विमानाने प्रवास करत होते. अजित पवार आणि त्यांच्या सहप्रवाशांना घेऊन मुंबईतून सकाळी ८ वाजून १० मिनिटांनी विमानाने टेकऑफ केले होते. दरम्यान, बारामतीत ८ वाजून ५० मिनिटांनी लँडिंग होणार होते. पण त्यापूर्वीच विमानात तांत्रिक बिघाड झाल्याने विमान बारामती जवळच्या गोजुबावी परिसरातील एका शेतात कोसळले. आणि यामध्ये अजित पवार यांच्यासह पाच जणांचा जागीच मृत्यू झाला. दरम्यान, घटनास्थळावरील जे फोटो आणि व्हिडीओ समोर आले आहेत, त्यामध्ये विमान जळून खाक झाल्याचे दिसत आहे.

अपघात झालेल्या विमानात कोण-कोण होतं? –

अजित दादा पवार
विदीप जाधव (अजित पवार यांचे खासगी सुरक्षारक्षक, मुंबई)
पायलट कॅप्टन सुमित कपूर
कॅप्टन संभवी पाठक
पिंकी माळी, फ्लाईट अटेंडंट

पवार कुटुंब बारामतीसाठी रवाना –अजित पवार यांच्या जाण्याने पवार कुटुंबाला सर्वात मोठा धक्का बसला असून खासदार सुप्रिया सुळे यांनी दादांच्या जाण्यानंतर आपल्या व्हाट्सअॅप स्टेटसला Devasted असे लिहिले आहे. दरम्यान, शरद पवार हे त्यांच्या पत्नीसह मुंबईतून तर खासदार सुप्रिया सुळे आणि अजित दादांच्या पत्नी सुनेत्रा पवार, पार्थ पवार हे दिल्लीतून बारामतीसाठी रवाना झाल्याचे समजते.

मुख्यमंत्री-उपमुख्यमंत्री बारामतीत दाखल होणार –

मुख्यमंत्री देवेंद्र फडणवीस यांनी आपले सर्व कार्यक्रम रद्द केले असून ते आणि उपमुख्यमंत्री एकनाथ शिंदे दोघेही थोड्याच वेळात बारामतीसाठी रवाना होत आहेत. राज्यात आज शासकीय सुटी जाहीर करण्यात आली असून तीन दिवसांचा दुखवटा जाहीर करण्यात आला आहे.