मुंबई, 20 मार्च: नाशिकच्या भोंदूबाबा कॅप्टन अशोक खरातचे विकृत कारनामे समोर आल्यानंतर त्याला पोलिसांनी अटक केली आहे. अशोक खरात यांचे पाद्यपुजन करतानाचे राज्य महिला आयोगाच्या अध्यक्ष रूपाली चाकणकर यांचे फोटो तसेच व्हिडिओ सोशल मीडियावर व्हायरल झाले होते. मात्र, या भोंदूबाबाची पाद्यपूजा केल्यानं राज्य महिला आयोगाच्या अध्यक्षा रूपाली चाकणकर यांच्या राजीनाम्याची मागणी जोर धरू लागली असताना आताच्या क्षणाची सर्वात मोठी बातमी समोर आली आहे.
रूपाली चाकणकर यांचा महिला आयोगाच्या अध्यक्षपदाचा राजीनामा –
शेकडो महिलांच्या लैंगिक छळाच्या आरोपांमुळे चर्चेत आलेल्या नाशिकच्या भोंदूबाबा अशोक खरात यांच्यामुळे रुपाली चाकणकर अडचणीत सापडल्या आहेत. अशोक खरात यांच्यासोबतचे फोटो आणि व्हिडिओ सोशल मीडियावर व्हायरल झाल्यानंतर चाकणकरांवर मोठा दबाव निर्माण झाला. या पार्श्वभूमीवर त्यांनी महिला आयोगाच्या अध्यक्षपदाचा राजीनामा दिला असून, तो राष्ट्रवादीच्या अध्यक्षा सुनेत्रा पवार यांच्याकडे सादर करण्यात आला आहे. तसेच, राष्ट्रवादीच्या महिला प्रदेशाध्यक्षपदाचाही त्यांना राजीनामा द्यावा लागणार असल्याची माहिती समोर येत आहे.
राजीनाम्यापुर्वी चाकणकरांनी मुख्यमंत्र्यांची घेतली भेट –
अशोक खरात यांचे पाद्यपुजन करतानाचे राज्य महिला आयोगाच्या अध्यक्ष रूपाली चाकणकर यांचे फोटो तसेच व्हिडिओ सोशल मीडियावर व्हायरल झाले होते. यानंतर रूपाली चाकणकर यांच्या राजीनाम्याची सर्वत्र मागणी केली जात होती. दरम्यान, राजीनाम्याचा दबाव वाढल्यानंतर रुपाली चाकणकर यांनी मुख्यमंत्री देवेंद्र फडणवीस यांची भेट घेतली. या भेटीत मुख्यमंत्र्यांनी त्यांना राजीनामा देण्याचा सल्ला दिल्याची माहिती समोर आली आहे. त्यानंतर, चाकणकरांनी उपमुख्यमंत्री सुनेत्रा पवार यांचीही भेट घेतली. या दोन्ही भेटींनंतर त्यांच्या राजीनाम्यावर अंतिम शिक्कामोर्तब झाल्याचे स्पष्ट झाले आहे.
