जळगाव, 24 मार्च: जळगाव शहरातील काही पेट्रोल पंपांवर पेट्रोल संपल्याच्या अफवा सध्या मोठ्या प्रमाणावर पसरत असल्याचे निदर्शनास आले आहे. या अफवांमुळे नागरिकांमध्ये अनावश्यक भीती आणि गोंधळ निर्माण होऊन पेट्रोल पंपांवर मोठ्या प्रमाणावर गर्दी होत आहे.
या पार्श्वभूमीवर जिल्हा प्रशासनाने स्पष्ट केले आहे की, जळगाव शहर तसेच संपूर्ण जिल्ह्यात पेट्रोल आणि डिझेलचा पुरेसा साठा उपलब्ध असून कोणत्याही प्रकारची इंधन टंचाई निर्माण झालेली नाही. इंधन पुरवठा साखळी पूर्णपणे सुरळीतपणे कार्यरत असून संबंधित यंत्रणेकडून सातत्याने देखरेख ठेवण्यात येत आहे. नागरिकांनी अफवांवर विश्वास ठेवू नये, असे आवाहन जिल्हाधिकारी रोहन घुगे यांच्यावतीने करण्यात आले आहे.
View this post on Instagram
सोशल मीडियावर फिरणाऱ्या अप्रमाणित संदेशांमुळे भीतीचे वातावरण निर्माण होत असल्याने नागरिकांनी केवळ अधिकृत माहितीवरच विश्वास ठेवावा. तसेच, भीतीपोटी इंधनाचा साठा करण्याचा किंवा एकाच वेळी मोठ्या प्रमाणात पेट्रोल-डिझेल खरेदी करण्याचा प्रयत्न करू नये, असेही प्रशासनाने स्पष्ट केले आहे.
पेट्रोल पंपांवर अनावश्यक गर्दी टाळून वाहतूक कोंडी व कायदा-सुव्यवस्थेची समस्या निर्माण होणार नाही, याची खबरदारी घेण्याचे आवाहन करण्यात आले आहे. इंधन पुरवठा सुरळीत ठेवण्यासाठी प्रशासन आणि संबंधित कंपन्यांकडून सर्व आवश्यक उपाययोजना करण्यात येत असून नागरिकांनी प्रशासनावर विश्वास ठेवावा, असेही सांगण्यात आले आहे.
दरम्यान, अफवा पसरविणे किंवा चुकीची माहिती प्रसारित करणे हा कायद्याने दंडनीय गुन्हा असून अशा प्रकारच्या कृत्यांवर कठोर कारवाई करण्यात येणार असल्याचा इशाराही प्रशासनाने दिला आहे. कोणतीही शंका असल्यास नागरिकांनी अधिकृत शासकीय माध्यमांद्वारेच माहिती घ्यावी, असे आवाहन करण्यात आले आहे. जिल्हा प्रशासन नागरिकांना शांतता, संयम व सहकार्य राखण्याचे आवाहन करीत आहे. सर्वांच्या सहकार्याने कोणतीही अनुचित परिस्थिती निर्माण होणार नाही, याची खात्री बाळगावी, असेही जिल्हाधिकारी घुगे यांनी स्पष्ट केलं आहे.
