पाचोरा, 5 एप्रिल: पाचोरा शहर व तालुक्यातील पत्रकारांची बैठक स्व. तात्यासाहेब आर.ओ. पाटील व्यापारी भवन येथे पार पडली. या बैठकीत पत्रकारांसंदर्भातील विविध मुद्द्यांवर चर्चा करण्यात आली. यावेळी पाचोरा तालुका पत्रकार बांधवांची बहुउद्देशीय सहकारी संस्था अथवा औद्योगिक कंपनी स्थापन करण्याचा ऐतिहासिक निर्णय एकमताने मंजूर करण्यात आल्याची माहिती पत्रकारांकडून देण्यात आली आहे.
बैठकीच्या प्रारंभी पत्रकारांच्या दैनंदिन समस्या, आर्थिक अस्थैर्य, तसेच उद्योग-व्यवसायाच्या संधी यावर सखोल चर्चा करण्यात आली. यावेळी तालुका माझा न्यूजचे संपादक बंडू सोनार यांनी बैठकीचे उद्दिष्ट स्पष्ट करताना पत्रकारांनी केवळ बातम्यांपुरते मर्यादित न राहता आर्थिकदृष्ट्या सक्षम होण्यासाठी पुढाकार घेण्याची गरज अधोरेखित केली.
याच अनुषंगाने पाचोरा शहर व तालुक्यातील पत्रकारांसाठी बहुउद्देशीय संस्था स्थापन करण्याचा महत्त्वपूर्ण प्रस्ताव मांडण्यात आला. या प्रस्तावाला उपस्थित सर्व पत्रकारांनी एकमताने मंजुरी देत सकारात्मक प्रतिसाद दिला. या निर्णयामुळे पत्रकारांसाठी रोजगारनिर्मिती व आर्थिक स्वावलंबनाचा नवा मार्ग खुला होणार असल्याची भावना व्यक्त करण्यात आली. तसेच जळगाव जिल्ह्यातील पत्रकारांसाठी लवकरच एक विशेष उपक्रम राबविण्यात येणार असल्याची माहितीही यावेळी देण्यात आली.
या बैठकीत ज्येष्ठ पत्रकार सी.एन. चौधरी, पत्रकार सुनील पाटील, सचिन सोमवंशी, डॉ. योगेश पाटील यांनी मार्गदर्शन करताना पत्रकारांनी संघटित होऊन आपल्या हक्कांसाठी लढा देण्याची गरज व्यक्त केली. “एकजुटीनेच पत्रकारांच्या समस्या सोडविता येतील,” असा ठाम विश्वास त्यांनी व्यक्त केला.
याप्रसंगी पत्रकार दिलीप जैन, अनिल येवले, राजू धनराळे, किशोर रायसागडा, एन.एस.भुरे, बंडू सोनार, संदीप परदेशी, दिलीप पाटील, प्रवीण मिस्तरी, ईसा तडवी, कुंदन बेलदार, गौतम सोनवणे, राजेंद्र खैरनार, सुनील कोळी, प्रवीण बोरसे, गजानन गिरी, राकेश सुतार, मनोहर पाटील, राहुल महाजन, भालचंद्र राजपूत, चिंतामण पाटील, भिकन पाटील, नंदकुमार शेलगर, गजानन लोंढे, फकीरचंद पाटील, भुननेश दुसाने, स्वप्निल कुमावत आदी पत्रकार उपस्थित होते.
