ईसा तडवी, प्रतिनिधी
पाचोरा, 30 एप्रिल: पाचोरा-भडगाव तालुक्यातील स्पर्धा परीक्षा व पोलीस भरतीत यश संपादन करणाऱ्या विद्यार्थ्यांचा गौरव करण्यासाठी भव्य सत्कार सोहळ्याचे आयोजन करण्यात आले आहे. लोकप्रिय आमदार किशोर आप्पा पाटील तसेच पाचोरा-भडगाव शिवसेना व युवा सेनेच्या पुढाकारातून हा कार्यक्रम आयोजित करण्यात आला आहे.
शुक्रवार, १ मे २०२६ रोजी सकाळी १० वाजता शिवसेना मध्यवर्ती कार्यालय, छत्रपती शिवाजी महाराज चौक, पाचोरा येथे हा सत्कार सोहळा पार पडणार आहे. आमदार किशोर आप्पा पाटील यांच्या हस्ते यशस्वी विद्यार्थी व त्यांच्या पालकांचा सन्मान करण्यात येणार आहे. या कार्यक्रमासाठी प्रा. राजेंद्र चिंचोले हे प्रमुख मार्गदर्शक म्हणून उपस्थित राहणार आहेत.
कार्यक्रमाला प्रांताधिकारी भूषण अहिरे, पोलीस उपअधीक्षक बापू रोहम, तहसीलदार विजय बनसोडे, पोलीस निरीक्षक राहुल पवार तसेच मुख्याधिकारी मंगेश देवरे हे प्रमुख अतिथी म्हणून उपस्थित राहणार आहेत. याशिवाय नगराध्यक्ष सौ. सुनीताताई पाटील, जिल्हाध्यक्ष रावसाहेब पाटील, कृषी उत्पन्न बाजार समितीचे सभापती गणेश पाटील, गटनेते सुमित पाटील, उपनगराध्यक्ष किशोर बारावकर यांच्यासह अनेक मान्यवरांची उपस्थिती राहणार आहे.
या सत्कार समारंभास शिक्षणप्रेमी नागरिक, स्पर्धा परीक्षा तयारी करणारे विद्यार्थी, यशस्वी विद्यार्थी व त्यांचे पालक यांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे. कार्यक्रमासंबंधी अधिक माहितीसाठी ९९२१२११६७७ या क्रमांकावर संपर्क साधण्याचे आवाहन संयोजक सुधीर पाटील यांनी केले आहे.
