अमळनेर, 30 एप्रिल: अमळनेर तालुक्यातील नगाव बु. येथील ग्रामपंचायत अधिकारी रविंद्र देविदास पवार (वय ४८) यांच्यावर लाच स्वीकारल्याप्रकरणी भ्रष्टाचार प्रतिबंधक कायद्यान्वये कारवाई करण्यात आली आहे. जिल्हा परिषद अंतर्गत कार्यरत असलेल्या या अधिकाऱ्याने विकास कामांच्या बिलासाठी लाचेची मागणी केल्याचा आरोप आहे.
नेमकं प्रकरण काय? –
तक्रारदाराच्या चुलत भावाला १५ वा वित्त आयोगांतर्गत नगाव बु. येथे सी.सी. गटार बांधकाम व पेव्हर ब्लॉक बसविण्याची सुमारे १२ लाख रुपयांची दोन कामे मिळाली होती. या कामांचे बिल मंजूर करून देण्यासाठी संबंधित अधिकाऱ्याने एकूण रकमेच्या ७ टक्के म्हणजेच ८४ हजार रुपयांची लाच मागितली होती.
तक्रारदाराने याबाबत ३० एप्रिल २०२६ रोजी लाचलुचपत प्रतिबंधक विभाग, जळगाव येथे तक्रार दाखल केली. त्यानुसार सापळा रचण्यात आला. पंचांच्या उपस्थितीत अमळनेर शहरातील केलेनगर परिसरात संबंधित अधिकाऱ्याच्या निवासस्थानी पडताळणी करण्यात आली.
या वेळी अधिकाऱ्याने यापूर्वीच १३ हजार रुपये ऑनलाइन (फोनपे) स्वीकारल्याची कबुली दिली. त्यानंतर तडजोडीनंतर ५० हजार रुपयांची लाच स्वतःच्या घरी स्वीकारताना त्याला रंगेहात पकडण्यात आले. या प्रकरणी अमळनेर पोलीस ठाण्यात गुन्हा दाखल करण्याची प्रक्रिया सुरू असून पुढील तपास सुरू आहे.
यांनी केली कारवाई –
ही कारवाई जळगाव लाचलुचपतप्रतिबंधक विभागाचे पोलीस उपअधीक्षक योगेश ठाकूर यांच्या पोलीस निरीक्षक हेमंत नागरे, पोलीस निरीक्षक स्मिता नवघरे, पोलीस उपनिरीक्षक दिनेशसिंग पाटील, सुरेश पाटील, पोलीस हवालदार बाळू मराठे, किशोर महाजन, सुनिल वानखेडे तसेच पोलीस कॉन्स्टेबल भूषण पाटील, मनोज पाटील, प्रणेश ठाकूर, अमोल सूर्यवंशी आणि सचिन चाटे यांनी केली.
