जळगाव, 9 मे: राष्ट्रवादी काँग्रेस शरद पवार गटाचे प्रवक्ते विकास लवांडे यांच्यावर हल्ला झाल्याची घटना समोर आली आहे. विकास लवांडे यांच्या अंगावर शाईच्या बाटल्या ओतण्यात आल्या. या शाईफेकीचा व्हिडीओ समोर आला असून तो सध्या समाज माध्यमांवर मोठ्या प्रमाणात व्हायरल होत आहे. दरम्यान, राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी या हल्ल्याचा निषेध केला आहे.
शाईफेक प्रकरणी दहा ते बारा जणांवर गुन्हा दाखल –
राष्ट्रवादी काँग्रेस शरदचंद्र पवार पक्षाचे नेते विकास लवांडे यांनी काही वारकरी आणि कीर्तनकारांबाबत केलेल्या वक्तव्यांवरून वाद निर्माण झाला होता. त्यानंतर हवेली तालुक्यात आज त्यांच्या अंगावर शाईफेक करण्यात आल्याचा व्हिडिओ समोर आला आहे. दरम्यान, विकास लवांडे यांच्यावर शाईफेक करणारे संग्राम भंडारे आणि अक्षय कांचन यांच्यावर लोणी काळभोर पोलीस स्टेशनमध्ये गुन्हा दाखल करण्यात आला आहे. संग्राम भंडारे आणि अक्षय कांचन यांच्यासह दहा ते बारा जणांवर गुन्हा दाखल करण्यात आल्याची माहिती समोर आली आहे.
रोहिणी खडसेंची प्रतिक्रिया –
विकास लवांडे शाईफेक प्रकरणावर रोहिणी खडसेंनी म्हटलंय की, राष्ट्रवादी काँग्रेस पार्टी शरदचंद्र पवार पक्षाचे प्रवक्ते आणि संघटक सचिव विकास लवांडे हे तालुका हवेली येथे एका प्रवचनासाठी जात असताना संग्राम भंडारे आणि त्यांच्या काही भाडोत्री गुंडांनी त्यांच्यावर भ्याड हल्ला केल्याचा आरोप करण्यात आला आहे. सुमारे १० ते १५ जणांनी एकत्र येत लवांडे यांना मारहाण केली असून, हल्लेखोरांपैकी दोघा-तिघांकडे पिस्तूलही असल्याचे सांगण्यात आले आहे. या घटनेचा तीव्र निषेध व्यक्त करत गृह विभागाने या प्रकरणाची गांभीर्याने दखल घ्यावी.
वारकरी संप्रदायाची बदनामी होतेय – रोहिणी खडसे
विचारांची लढाई ही विचारांनीच लढली गेली पाहिजे. मात्र, वारकरी संप्रदायात काही अविचारी लोक घुसले असून ते जाणीवपूर्वक समाजात विष पेरण्याचे काम करत आहेत. आम्ही यापूर्वीही या विषयावर वारंवार भाष्य केले आहे. विकास लवांडे यांच्यावर झालेला हल्ला हा त्याचाच सबळ पुरावा आहे. अशा प्रवृत्तीमुळे पवित्र वारकरी संप्रदायाची बदनामी होत असून, हे वेळीच थांबवणे गरजेचे आहे, असेही त्यांनी म्हटले आहे.
