जळगाव, 17 मे: जळगाव जिल्ह्यातील एरंडोल परिसरात ट्रॅक्टर चोरी करणाऱ्या टोळीचा स्थानिक गुन्हे शाखेच्या पथकाने पर्दाफाश केला असून, दोन संशयितांना ताब्यात घेण्यात आले आहे. या कारवाईत एरंडोल पोलीस ठाण्यात दाखल असलेल्या दोन वेगवेगळ्या गुन्ह्यांतील तब्बल 3 लाख 25 हजार रुपये किमतीचे दोन ट्रॅक्टर हस्तगत करण्यात आले आहेत. ताब्यात घेतलेल्या आरोपींपैकी एक विधीसंघर्षग्रस्त बालक असल्याची माहिती पोलिसांनी दिली.
काय आहे संपुर्ण बातमी? –
एरंडोल पोलीस स्टेशनमध्ये गुन्हा रजिस्टर क्रमांक 44/2026 आणि 84/2026 अंतर्गत ट्रॅक्टर चोरीचे सलग गुन्हे दाखल झाले होते. या घटनांचे गांभीर्य लक्षात घेऊन पोलीस अधीक्षकांनी स्थानिक गुन्हे शाखेला समांतर तपास करण्याच्या सूचना दिल्या होत्या.
त्यानुसार स्थानिक गुन्हे शाखेचे पोलीस निरीक्षक राहुल गायकवाड यांनी अधिकारी व कर्मचाऱ्यांचे विशेष पथक तयार करून गुन्ह्यांचा तातडीने छडा लावण्याचे आदेश दिले. पथकाने तांत्रिक विश्लेषण व गोपनीय माहितीच्या आधारे विखरण (ता. एरंडोल) येथील विकी देवरे आणि एका विधीसंघर्षग्रस्त बालकाला ताब्यात घेत चौकशी केली.
चौकशीदरम्यान त्यांनी हे दोन्ही गुन्हे गणेश भिकन गोसावी व प्रवीण भाईदास कोळी (दोघे रा. विखरण, ता. एरंडोल) यांच्या साथीने केल्याची कबुली दिली. पोलिसांनी आरोपींकडून चोरीस गेलेले दोन ट्रॅक्टर जप्त केले असून, फरार असलेल्या इतर दोन आरोपींचा कसून शोध सुरू असल्याचे सांगण्यात आले.
सदरची कार्यवाही कामगिरी पोलीस अधीक्षक श्रीकांत धिवरे, अपर पोलीस अधीक्षक कविता नेरकर, उपविभागीय पोलीस अधिकारी विनायक कोते यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या नेतृत्वातील पथकातील पीएसआय जितेंद्र वल्टे, हेकॉ. संदीप रमेश पाटील, हेकॉ. प्रवीण जनार्दन मांडोळे, हेकॉ. हरीलाल लक्ष्मण पाटील, पोकॉ. राहुल नथू कोळी, हेकॉ. संदीप रमेश पाटील, हेकॉ. महेश मुरलीधर पाटील, पोकॉ. सागर गुलाब पाटील, पोकॉ. भूषण जगदीश शेलार, चापोशि बाबासाहेब पाटील या पथकाने उत्कृष्ट व उल्लेखनीय कामगिरी केली आहे.
