जळगाव, 30 मे: ग्रामीण भागातील युवक-युवती आणि महिलांना कौशल्याधारित प्रशिक्षणाच्या माध्यमातून स्वावलंबी बनविण्यासाठी कार्यरत असलेल्या ग्रामीण स्वयंरोजगार प्रशिक्षण संस्था – आरसेटी (RSETI) संस्थेच्या जळगाव केंद्राला आज जिल्हाधिकारी रोहन घुगे यांनी भेट दिली. यावेळी त्यांनी केंद्रात सुरू असलेल्या ‘ब्युटी पार्लर मॅनेजमेंट’ तसेच ‘कृषी उद्यमी (Agriculture Entrepreneur)’ या प्रशिक्षण बॅचमधील प्रशिक्षणार्थींशी थेट संवाद साधत त्यांना मार्गदर्शन केले आणि त्यांच्या भावी वाटचालीसाठी शुभेच्छा दिल्या.
जिल्हाधिकाऱ्यांनी प्रशिक्षणार्थींच्या अनुभवांची माहिती घेत कौशल्य विकास आणि स्वयंरोजगाराच्या संधींबाबत चर्चा केली. तसेच प्रशिक्षणाचा लाभ घेऊन स्वतःचा व्यवसाय उभारण्याचे आवाहनही त्यांनी यावेळी केले.
या कार्यक्रमाला सेंट्रल बँक ऑफ इंडियाचे अग्रणी जिल्हा व्यवस्थापक (LDM) सुनील दोहरे, आरसेटी जळगावचे संचालक सत्यनारायण लाल दास, तसेच सेंट्रल बँक ऑफ इंडियाचे वरिष्ठ व्यवस्थापक जतीन वालेचा यांची प्रमुख उपस्थिती होती.
याशिवाय गेस्ट फॅकल्टी विष्णू देबाजे व अनिता पाटील, संस्थेच्या मुख्य फॅकल्टी संजीवनी राजधर मोरे आणि दिग्विजय खंबायत, तसेच सहाय्यक सचिन दीपक मराठे, अश्विन बापू मराठे, कल्पेश गौतम ढिवरे आणि विनोद पाटील उपस्थित होते.
जिल्हाधिकाऱ्यांच्या भेटीमुळे प्रशिक्षणार्थींमध्ये उत्साहाचे वातावरण निर्माण झाले असून, ग्रामीण भागातील युवक-युवतींना कौशल्य विकासाच्या माध्यमातून रोजगार व स्वयंरोजगाराच्या संधी उपलब्ध करून देण्याच्या आरसेटीच्या कार्याला अधिक बळ मिळणार असल्याची भावना यावेळी व्यक्त करण्यात आली.
