ईसा तडवी, प्रतिनिधी
पिंपळगाव हरे., 20 जून: पिंपळगाव हरे पोलीस स्टेशन हद्दीतील वरसाडे तांडा येथील महिला भगिनींनी सामाजिक जबाबदारीचे भान राखत अवैध धंद्यांविरोधात एकजुटीने पुढाकार घेतल्याने गावातील बेकायदेशीर कारवायांवर आळा बसण्यास मदत झाली आहे. महिलांनी धाडसाने पुढे येत पोलिसांना वेळोवेळी अचूक माहिती दिल्यामुळे अवैध दारू विक्री, जुगार, मटका तसेच इतर बेकायदेशीर धंद्यांवर प्रभावी कारवाई करण्यात आली. त्यामुळे गावातील वातावरण अधिक सुरक्षित, शांततापूर्ण आणि कायद्याचे पालन करणारे बनल्याचे सांगण्यात आले.
‘महिलांनी दाखविलेला पुढाकार इतर गावांसाठी प्रेरणादायी’ –
महिलांच्या या सामाजिक योगदानाबद्दल पिंपळगाव हरे पोलीस स्टेशनच्या प्रभारी सहाय्यक पोलीस निरीक्षक कल्याणी वर्मा यांनी त्यांचे कौतुक केले. यावेळी त्यांनी गुन्हेगारीविरोधातील लढा हा केवळ पोलिसांचा नसून संपूर्ण समाजाचा असल्याचे सांगत महिलांनी दाखविलेला पुढाकार इतर गावांसाठीही प्रेरणादायी ठरेल, असे मत व्यक्त केले.
उपस्थितांना मार्गदर्शन करताना कल्याणी वर्मा म्हणाल्या की, समाजातील प्रत्येक महिला ही केवळ आपल्या कुटुंबाचीच नव्हे तर संपूर्ण गावाच्या सुरक्षिततेची रक्षक आहे. अवैध धंद्यांमुळे अनेक कुटुंबांचे आर्थिक, सामाजिक व नैतिक नुकसान होत असल्याने अशा बेकायदेशीर कृत्यांविरोधात महिलांनी निर्भयपणे पुढे यावे. पोलिसांना मिळालेल्या माहितीच्या आधारे संबंधितांवर तात्काळ कायदेशीर कारवाई करण्यात येईल तसेच माहिती देणाऱ्यांची ओळख पूर्णपणे गोपनीय ठेवली जाईल, असे त्यांनी स्पष्ट केले.
बेकायदेशीर धंद्यांची माहिती पोलिसांना देण्याचे आवाहन –
पोलीस स्टेशन हद्दीतील इतर गावांतील महिला भगिनी, बचत गट, सामाजिक संघटना तसेच नागरिकांनीही वरसाडे तांड्याचा आदर्श घ्यावा, असे आवाहन यावेळी करण्यात आले. परिसरातील अवैध दारू विक्री, जुगार, मटका, गुटखा, अमली पदार्थ तसेच इतर कोणत्याही बेकायदेशीर धंद्यांची माहिती पोलिसांना देऊन समाजहितासाठी सहकार्य करण्याचे आवाहन करण्यात आले.
“अवैध धंद्यांविरोधातील तुमचा लढा हा गावाच्या उज्ज्वल भविष्यासाठी आहे. तुमच्या धाडसामुळे अनेक कुटुंबे व्यसनमुक्त व सुरक्षित जीवन जगू शकतील. इतर गावांतील महिलांनीही समाजहितासाठी पुढाकार घ्यावा,” असे आवाहन सहाय्यक पोलीस निरीक्षक कल्याणी वर्मा यांनी केले.
