ईसा तडवी, प्रतिनिधी
जामनेर, 6 जुलै: राष्ट्रीय आदिवासी एकता परिषद, नवी दिल्ली यांच्या वतीने 5 जुलै 2026 रोजी आयोजित बैठकीत हजराताई गनी तडवी यांची राष्ट्रीय आदिवासी एकता परिषदेच्या जामनेर तालुका अध्यक्षपदी सर्वानुमते निवड करण्यात आली. संघटनेच्या कार्याचा आढावा घेऊन आगामी वाटचालीबाबत झालेल्या चर्चेनंतर ही निवड जाहीर करण्यात आली.
प्रदेश सचिव अॅड. रणजित तडवी व अन्य पदाधिकाऱ्यांच्या उपस्थितीत झालेल्या या बैठकीत हजराताई तडवी यांच्या सामाजिक क्षेत्रातील कार्याचा अनुभव, समाजाप्रती असलेली बांधिलकी आणि नेतृत्वगुणांचा गौरव करत त्यांच्यावर तालुका अध्यक्षपदाची जबाबदारी सोपविण्यात आली.
निवडीनंतर हजराताई गनी तडवी यांनी संघटनेने दाखविलेल्या विश्वासाबद्दल आभार व्यक्त केले. जामनेर तालुक्यातील आदिवासी समाजाच्या विविध प्रश्नांना प्राधान्याने वाचा फोडणे, शासकीय योजनांचा लाभ तळागाळातील लाभार्थ्यांपर्यंत पोहोचविणे तसेच तालुक्यात संघटनेचे जाळे अधिक मजबूत करण्यासाठी प्रामाणिकपणे कार्य करणार असल्याचा विश्वास त्यांनी व्यक्त केला.
दरम्यान, त्यांच्या निवडीबद्दल राष्ट्रीय आदिवासी एकता परिषदेच्या राज्य उपाध्यक्ष अश्विनी भाकडे, बी.एम.पी.चे तालुका अध्यक्ष राहुल सपकाळ, जिल्हाध्यक्ष गफूर तडवी, राज्य कार्यकारिणी सदस्य रोनक तडवी, राष्ट्रीय आदिवासी छात्र संघाचे सिराज तडवी, तालुका उपाध्यक्ष मुस्तफा तडवी, जामनेर तालुक्यातील पदाधिकारी सायबू तडवी, सांडू तडवी तसेच राज्यस्तरीय पदाधिकारी, विविध क्षेत्रातील मान्यवर, कार्यकर्ते आणि हितचिंतकांनी त्यांचे अभिनंदन करून पुढील वाटचालीस शुभेच्छा दिल्या.
हेही वाचा: राज्यात मुसळधार पावसाचा कहर; विविध दुर्घटनांत 9 जणांचा मृत्यू, अनेक भागांत जनजीवन विस्कळीत
