ईसा तडवी, प्रतिनिधी
सातगाव डोंगरी (पाचोरा), 4 ऑगस्ट: महसूल विभागातील उत्कृष्ट व कर्तव्यदक्ष सेवेसाठी सातगाव डोंगरीचे कोतवाल (महसूल सेवक) उमेश चव्हाण यांना ‘आदर्श महसूल सेवक’ पुरस्काराने गौरविण्यात आले. तहसीलदार विजय बनसोडे यांच्या हस्ते त्यांना हा पुरस्कार प्रदान करण्यात आला.
उमेश चव्हाण यांनी आपल्या कार्यकाळात सातगाव डोंगरी परिसरातील महसूल विषयक कामे वेळेत आणि प्रभावीपणे पूर्ण करण्याबरोबरच शासनाच्या विविध कल्याणकारी योजनांचा लाभ तळागाळातील नागरिकांपर्यंत पोहोचविण्यासाठी सातत्याने प्रयत्न केले आहेत. प्रामाणिकपणा, कर्तव्यनिष्ठा आणि जनसेवेची भावना जपत त्यांनी केलेल्या उल्लेखनीय कार्याची दखल घेत महसूल प्रशासनाने त्यांना या पुरस्काराने सन्मानित केले.
पुरस्कार वितरण समारंभात तहसीलदार विजय बनसोडे यांनी उमेश चव्हाण यांच्या कार्याचे विशेष कौतुक केले. “शासकीय सेवेत प्रामाणिकपणे आणि जबाबदारीने काम करणाऱ्या कर्मचाऱ्यांमुळे प्रशासनावरील नागरिकांचा विश्वास अधिक दृढ होतो,” असे त्यांनी यावेळी सांगितले.
या सन्मानाबद्दल उमेश चव्हाण यांच्यावर महसूल विभागातील अधिकारी व कर्मचारी, तसेच सातगाव डोंगरी परिसरातील ग्रामस्थांकडून अभिनंदनाचा वर्षाव होत असून, त्यांच्या कार्याचे सर्व स्तरांतून कौतुक केले जात आहे.
हेही वाचा: पत्नीने दिले यकृत अन् मुख्यमंत्री सहाय्यता निधीने दिला आधार; पतीला मिळाले नवे आयुष्य
