ईसा तडवी, प्रतिनिधी
लासगाव (पाचोरा), 11 ऑगस्ट: पाचोरा तालुक्यातील लासगाव येथे संत सावता माळी महाराज यांची पुण्यतिथी आज 11 ऑगस्ट रोजी सकाळी 11 वाजता पारंपरेनुसार आणि भक्तिमय वातावरणात उत्साहात साजरी करण्यात आली. माळी समाजबांधवांच्यावतीने ह्या कार्यक्रमाचे आयोजन करण्यात आले.
कार्यक्रमाच्या प्रारंभी संत सावता माळी महाराज यांच्या प्रतिमेस विधिवत माल्यार्पण करण्यात आले. त्यानंतर आरती करण्यात आली. तसेच आरतीच्या वेळी उपस्थित भाविकांनी भक्तिभावाने सहभाग घेतला. यावेळी ग्रामस्थांनी मोठ्या संख्येने उपस्थित राहत संत सावता माळी महाराजांना अभिवादन केले.
पुण्यतिथीनिमित्त गावातील नागरिकांसाठी महाप्रसादाचे आयोजन करण्यात आले होते. . महाप्रसादाच्या आयोजनामुळे ग्रामस्थांमध्ये एकोप्याचे आणि भक्तीचे वातावरण पाहायला मिळाले. यावेळी महिला, पुरुष, ज्येष्ठ नागरिक तसेच युवक मोठ्या संख्येने उपस्थित होते. दरम्यान, पुण्यतिथीनिमित्त आज रात्री ८.३० वाजता किर्तनाचा कार्यक्रम आयोजित करण्यात आला आहे.
लासगाव ग्रामपंचायतीत संत सावता माळी महाराजांची पुण्यतिथी साजरी –
लासगाव ग्रामपंचायतीच्या वतीनेही संत सावता माळी महाराजांची पुण्यतिथी भक्तिभावाने साजरी करण्यात आली. यावेळी संत सावता माळी महाराजांच्या प्रतिमेस माल्यार्पण करून पूजन करण्यात आले. याप्रसंगी ग्रामपंचायतीचे माजी सरपंच, सदस्य तसेच कर्मचारी आणि ग्रामस्थांनी उपस्थित राहून संत सावता माळी महाराजांना अभिवादन केले.
हेही वाचा: “काशीचा नशामुक्तीचा संदेश जळगावच्या प्रत्येक गावात पोहोचला पाहिजे” — केंद्रीय राज्यमंत्री रक्षा खडसे
