ईसा तडवी, प्रतिनिधी
पाचोरा, 22 ऑगस्ट: तारखेडा परिसरातील रेल्वे गेट तसेच शेतकऱ्यांसाठी वापरला जाणारा रस्ता रेल्वे प्रशासनाकडून बंद करण्यात आल्याने निर्माण झालेल्या समस्येची खासदार स्मिता वाघ यांनी प्रत्यक्ष पाहणी करून आढावा घेतला. नागरिक व शेतकऱ्यांची गैरसोय टाळण्यासाठी बंद करण्यात आलेल्या मार्गाला पर्यायी व्यवस्था तातडीने उपलब्ध करून देण्याच्या सूचना त्यांनी संबंधित अधिकाऱ्यांना दिल्या.
तारखेडा परिसरातील रेल्वे गेट व शेतकरी रस्ता बंद झाल्याने ग्रामस्थ आणि शेतकऱ्यांमध्ये नाराजी निर्माण झाली होती. या प्रश्नाबाबत ग्रामस्थांनी आमदार किशोर आप्पा पाटील यांची भेट घेऊन समस्या मांडली होती. आमदार पाटील यांनी या प्रश्नाची तातडीने दखल घेत खासदार स्मिता वाघ यांच्याशी संपर्क साधून रेल्वे प्रशासनाशी समन्वय साधत समस्या सोडविण्याची मागणी केली.
यानंतर शिवसेना तालुकाप्रमुख राजेंद्र पाटील यांनीही खासदार स्मिता वाघ यांच्याशी दूरध्वनीवरून चर्चा करून रेल्वे मार्गामुळे निर्माण झालेल्या अडचणी तसेच ग्रामस्थांच्या विविध मागण्या त्यांच्या निदर्शनास आणून दिल्या. आमदार किशोर आप्पा पाटील यांच्या सूचनेनुसार आणि तालुकाप्रमुख राजू दादा पाटील यांच्या पाठपुराव्याची दखल घेत खासदार वाघ यांनी अवघ्या दोन ते तीन दिवसांत तारखेडा येथे भेट देत प्रत्यक्ष पाहणी केली.
पाहणीदरम्यान खासदार स्मिता वाघ यांनी रेल्वे मार्गालगतच्या विविध ठिकाणी जाऊन परिस्थितीची पाहणी केली. ज्या ठिकाणी रेल्वे प्रशासनाने अचानक रस्ता बंद केला आहे, त्या ठिकाणी शेतकरी व नागरिकांची ये-जा तसेच शेतीच्या कामांमध्ये अडथळा निर्माण होऊ नये, यासाठी पर्यायी मार्गाची तातडीने व्यवस्था करण्याच्या सूचना संबंधित अधिकाऱ्यांना देण्यात आल्या.
दरम्यान, शिवसेना तालुकाप्रमुख राजेंद्र पाटील यांनी पाचोरा रेल्वे स्थानकावरील प्रवासी सुविधांमध्ये वाढ करण्याबरोबरच अधिक रेल्वे गाड्यांना पाचोरा येथे थांबा देण्याची मागणी खासदार वाघ यांच्याकडे केली. त्यावर खासदार वाघ यांनी सकारात्मक प्रतिसाद देत प्रथम विदर्भ एक्स्प्रेसला पाचोरा येथे थांबा मिळवून देण्यासाठी प्रयत्न करण्याचे आश्वासन दिले. तसेच इतर प्रवासी सुविधा व मागण्यांसाठीही टप्प्याटप्प्याने पाठपुरावा करण्याचे त्यांनी सांगितले.
या पाहणीवेळी माजी जिल्हा परिषद सदस्य मधूकर काटे, सुभाष पाटील, नंदू पाटील, गणेश पाटील वाघुलखेडा यांच्यासह ग्रामस्थ उपस्थित होते. पाहणीनंतर खासदार स्मिता वाघ यांनी काही दिवसांपूर्वी तारखेडा येथे झालेल्या रेल्वे अपघातात मृत्यू झालेल्या राजेंद्र पाटील यांच्या चुलत पुतण्याच्या कुटुंबीयांची त्यांच्या निवासस्थानी भेट घेऊन सांत्वन केले.
यावेळी कृषी उत्पन्न बाजार समितीचे माजी संचालक वसंत वाघ, शिवसेना शाखाप्रमुख धनराज पाटील, किशोर पाटील, पंकज पाटील, आनंदा पाटील, निलेश पाटील, विजय पाटील, शरद पाटील यांच्यासह ग्रामस्थ मोठ्या संख्येने उपस्थित होते.
