पाचोरा, 13 सप्टेंबर: गणेशोत्सवाच्या पार्श्वभूमीवर शहरातील कायदा व सुव्यवस्था अबाधित राहावी, यासाठी पाचोरा पोलिसांनी रविवारी पहाटे धडक ‘कॉम्बिंग ऑपरेशन’ राबविले. पहाटे ३ ते सकाळी ६.३० वाजेपर्यंत शहर तसेच ग्रामीण हद्दीत करण्यात आलेल्या या कारवाईत अभिलेखावरील ५५ गुन्हेगारांना ताब्यात घेऊन समज देण्यात आली. तसेच हद्दपार असलेला सराईत गुन्हेगार हद्दीत आढळून आल्याने त्याच्याविरुद्ध गुन्हा दाखल करण्यात आला.
उपविभागीय पोलीस अधिकारी बापू रोहम यांच्या मार्गदर्शनाखाली पाच पोलीस अधिकारी, २५ पोलीस अंमलदार आणि स्थानिक गुन्हे शाखेच्या (एलसीबी) पथकाने संयुक्तपणे ही मोहीम राबविली. यावेळी सराईत गुन्हेगार, शरीर व मालमत्तेविरुद्ध गुन्हे दाखल असलेले आरोपी तसेच अवैध धंद्यांमध्ये सहभागी असलेल्या संशयितांच्या घरांची अचानक तपासणी व झडती घेण्यात आली.
या कारवाईत पाचोरा पोलीस ठाण्याच्या अभिलेखावरील एकूण ५५ आरोपींना ताब्यात घेऊन पोलीस ठाण्यात आणण्यात आले. गणेशोत्सवाच्या काळात कोणत्याही प्रकारचे गैरकृत्य करू नये, याबाबत त्यांना कडक समज देण्यात आली. दरम्यान, पाचोरा शहरातून हद्दपार करण्यात आलेला सराईत गुन्हेगार मुख्तार शेख उर्फ धाड्या हा पोलिसांना हद्दीत आढळून आला. त्याच्याविरुद्ध मुंबई पोलीस कायदा कलम १४२ अन्वये गुन्हा दाखल करून कायदेशीर कारवाई करण्यात आली.
तसेच न्यायालयात प्रलंबित असलेल्या विविध प्रकरणांतील ११ अजामीनपात्र वॉरंट (NBW) बजावण्यात आले. अवैध दारू विक्रीविरोधातही पोलिसांनी कारवाई केली. प्रोहिबिशन रेडमध्ये एकूण २२ हजार ४० रुपयांचा मुद्देमाल जप्त करण्यात आला. याशिवाय अवैध गोवंश वाहतुकीविरोधात एक, तर बेकायदेशीर शस्त्र बाळगल्याप्रकरणी आर्म ॲक्टअंतर्गत एक कारवाई करण्यात आली.
गणेशोत्सवाच्या काळात शांतता भंग करणाऱ्या, कायदा हातात घेणाऱ्या तसेच अवैध धंदे चालविणाऱ्या व्यक्तींविरुद्ध कठोर कारवाई केली जाईल, असा इशारा पोलिसांनी दिला आहे. शहर व ग्रामीण भागात अशा प्रकारची धडक तपासणी, गस्त आणि कारवाई यापुढेही सुरू राहणार असल्याचे पोलिस प्रशासनाने स्पष्ट केले.
