जळगाव, 16 ऑक्टोबर: आदिवासी समाजातील पात्र लाभार्थ्यांपर्यंत शासकीय योजनांची माहिती पोहोचवून त्यांना योजनांचा लाभ मिळवून देणे आणि तडवी-भिल्ल समाजासह आदिवासी समाजाच्या सर्वांगीण विकासासाठी विविध योजनांची माहिती आणि मार्गदर्शन एकाच ठिकाणी उपलब्ध करून देण्याच्या उद्देशाने ‘सेवा संकल्प अभियानांतर्गत’ उद्या शनिवार, १७ ऑक्टोबर रोजी सकाळी ११ वाजता जामनेर तालुक्यातील पहूर येथे भव्य आदिवासी लाभार्थी मार्गदर्शन मेळावा आयोजित करण्यात आला आहे. राज्य शासनाच्या आदिवासी विकास विभागाच्या व एकात्मिक आदिवासी विकास प्रकल्प, यावल यांच्या संयुक्त विद्यमाने हा मेळावा ‘माळी समाज मंगल कार्यालय येथे होणार आहे.
राज्याचे आदिवासी विकासमंत्री प्रा.डॉ.अशोक उईके मेळाव्याच्या अध्यक्षस्थानी असतील. जलसंपदा व आपत्ती व्यवस्थापनमंत्री गिरीश महाजन यांच्या हस्ते मेळाव्याचे उद्घाटन होणार आहे. केंद्रीय राज्यमंत्री रक्षा खडसे, पालकमंत्री तथा पाणीपुरवठा व स्वच्छतामंत्री गुलाबराव पाटील, वस्त्रोद्योगमंत्री संजय सावकारे, आदिवासी विकास राज्यमंत्री इंद्रनील नाईक आणि पसमंदा मुस्लिम समाज अभ्यास समितीचे अध्यक्ष (राज्यमंत्री दर्जा) इद्रिस मुलतानी यांच्यासह जिल्ह्यातील खासदार व आमदार उपस्थित राहणार आहेत.
जळगाव जिल्ह्यातील लोकप्रतिनिधींसह आदिवासी विकास विभागाचे सचिव विजय वाघमारे, आयुक्त लीना बनसोड, जिल्हाधिकारी रोहन घुगे, जिल्हा पोलीस अधीक्षक श्रीकांत धिवरे, जिल्हा परिषदेच्या मुख्य कार्यकारी अधिकारी करिश्मा नायर आणि आदिवासी विकास विभागाचे नाशिक येथील अपर आयुक्त दिनकर पावरा हे प्रमुख अतिथी व मार्गदर्शक म्हणून उपस्थित राहतील.
मेळाव्यात आदिवासी विकास विभागासह अन्य शासकीय विभागांच्या वतीने विविध कल्याणकारी योजनांची माहिती देणारे स्वतंत्र कक्ष उभारण्यात येणार आहेत. शैक्षणिक, आर्थिक, गृहनिर्माण आणि स्वयंरोजगार योजनांचे निकष, आवश्यक कागदपत्रे तसेच ऑनलाइन अर्ज करण्याच्या प्रक्रियेबाबत नागरिकांना प्रत्यक्ष मार्गदर्शन केले जाईल. त्यामुळे पात्र लाभार्थ्यांना योजनांची माहिती मिळविणे आणि लाभासाठी अर्ज करणे सुलभ होणार आहे.
नाशिक विभागातील आदिवासी विकास विभागाच्या आश्रमशाळांमध्ये विशेष प्रावीण्य मिळविणाऱ्या तीन विद्यार्थी आणि तीन विद्यार्थिनी अशा सहा गुणवंत विद्यार्थ्यांना ‘राघोजी भांगरे विद्यार्थी गुणगौरव’ पुरस्काराने सन्मानित करण्यात येणार आहे. तसेच पवित्र पोर्टल प्रणालीद्वारे पारदर्शक पद्धतीने निवड झालेल्या शिक्षकांना मान्यवरांच्या हस्ते अधिकृत सेवा नियुक्तिपत्रे वितरित करण्यात येणार आहेत.
तडवी-भिल्ल समाजासह आदिवासी समाजातील गरजू आणि पात्र लाभार्थ्यांना शासकीय योजनांचा लाभ मिळवून देण्यासाठी हा मेळावा महत्त्वपूर्ण ठरणार आहे. जामनेर, पहूर आणि परिसरातील आदिवासी समाजबांधव, महिला, युवक-युवती आणि पात्र लाभार्थ्यांनी मोठ्या संख्येने उपस्थित राहून योजनांची माहिती घ्यावी आणि उपलब्ध संधींचा लाभ घ्यावा, असे आवाहन यावल एकात्मिक आदिवासी विकास प्रकल्प अधिकारी अरुण पवार यांनी केले आहे.
