जळगाव, 9 ऑक्टोंबर : जळगाव जिल्ह्यात निपूण भारत अभियानांतर्गत उद्यापासून 10 ऑक्टोंबर ते 20 ऑक्टोंबरपर्यंत इयत्ता 1 ली ते इयत्ता 7 वीच्या मुलांसाठी ‘दहा दिवस गणितासाठी’ हा उपक्रम राबविण्यात येणार आहे, अशी माहिती जिल्हाधिकारी आयुष प्रसाद व जिल्हा परिषदेचे मुख्य कार्यकारी अधिकारी अंकित यांनी दिली आहे.
निपूण भारत अभियानांतर्गत उपक्रम –
निपूण भारत अभियानांतर्गत प्राथमिक शिक्षण घेणाऱ्या मुलांचे अंकगणित कौशल्य वृध्दींगत व्हावे, यासाठी कालबध्द कार्यक्रम आखणी करण्यात आली आहे. या कार्यक्रमाची अंमलबजावणी यंत्रणा म्हणून जिल्हा शिक्षण व प्रशिक्षण संस्था, जिल्हा परिषद शिक्षण विभाग, डायट प्राचार्य, शिक्षणाधिकारी (प्राथमिक/माध्यमिक), पंचायत समिती गटशिक्षणाधिकारी हे काम करणार आहेत.
असा असेल उपक्रम –
जळगाव जिल्ह्यातील प्राथमिक शाळांमध्ये उद्यापासून “दहा दिवस गणितासाठी” या उपक्रमात गणनपूर्व तयारी, संख्याज्ञान, संख्यावरील क्रिया, सराव तसेच कृती या पध्दतीचा वापर केला जाणार आहे. यामाध्यमातून विद्यार्थ्यांना प्रत्यक्ष शैक्षणिक साहित्याचा वापर करून गणित हा विषय रंजक पद्धतीने शिकविण्यात येणार आहे. या उपक्रमांतर्गत शिक्षकांना त्यांच्या स्तरावर विद्यार्थ्यांची गरज लक्षात घेऊन पूरक अधिकच्या कृतींचे आयोजन करता येण्याची मुभा देण्यात आली आहे.
गणिताची आवड निर्माण व्हावी –
या उपक्रमात आनंददायी कृतींचा, गणितीय खेळांचा, परिसरात व शाळेत उपलब्ध साहित्याचा यथायोग्य वापर करून गणितीय संकल्पनांचे विद्यार्थ्यांना आकलन होईल, अशा कृती कराव्यात, जेणेकरून विद्यार्थ्यांमध्ये गणिताची आवड निर्माण होईल. पायाभूत क्षमता असणाऱ्या विद्यार्थ्यांसाठी आवश्यकतेनुसार उच्चस्तर अध्ययन कृती घेण्याच्या सूचना देण्यात आलेल्या आहेत.
अंमलबजावणीसाठी अधिकाऱ्यांना महत्वाच्या सूचना –
या उपक्रमाची काटेकोर अंमलबजावणी करण्यासाठी शिक्षण विभागाच्या अधिकाऱ्यांनी व डायट मधील सर्व अधिकाऱ्यांनी दैनंदिन किमान 2 शाळांना भेटी कराव्यात तसेच सदर उपक्रम सुरू असल्याची खात्री करावी, अशा सूचना देण्यात आल्याची माहिती जिल्हा परिषदेचे मुख्य कार्यकारी अधिकारी अंकित यांनी सांगितले.
