ईसा तडवी, प्रतिनिधी
पाचोरा, 18 ऑक्टोबर : जळगाव जिल्ह्यात दिवसेंदिवस गुन्हेगारींच्या घटनांमध्ये वाढ होत असताना पाचोरा तालुक्यातून एक धक्कादायक घटना समोर आली आहे. पाचोरा तालुक्यातील एका गावात गतीमंद मुलीवर अत्याचार केल्याची घटना घडली आहे. आरोपीने केलेल्या अत्याचारातून गतीमंद अल्पवयीन मुलगी गर्भवती राहिली.
काय आहे संपूर्ण प्रकरण ? –
पोलिसांनी दिलेल्या माहितीनुसार, पाचोरा तालुक्यातील एका गावातील अल्पवयीन मतीमंद मुलीवर अज्ञात आरोपीने अत्याचार करीत तिला 5 महिन्याची गर्भवती केले. याप्रकरणी अज्ञात आरोपीविरोधात पिंपळगाव (हरे.) पोलिसात गुन्हा दाखल करण्यात आला आहे. पिंपळगाव (हरे.) पोलीस ठाण्याचे पोलीस उपनिरीक्षक अमोल पवार यांनी याबाबतची माहिती दिली.
गतीमंद मुलीवर अत्याचार –
मिळालेल्या माहितीनुसार, पाचोरा तालुक्यातील एका गावात 40 वर्षीय वडील आपल्या परिवारासह वास्तव्यास आहे. त्यांचे कुटुंब परिसरातील शेतात मजुरी करून आपल्या परिवाराचा उदरनिर्वाह करतात. त्यांना एक 16 वर्षीय गतीमंद मुलगी आहे. त्या परिवाराचे घरी कुणीही नसताना एका संशयिताने तिच्या गतीमंद असण्याचा फायदा घेत 16 मे 2023 रोजी पासून ते दि. 16 ऑक्टोबर 2023 यादरम्यान अत्याचार केला. दरम्यान, ही गतीमंद मुलगी गर्भवती राहिल्याचा प्रकार उघडकीस आला आहे.
असा आला प्रकार समोर –
दरम्यान, या मुलीचा ज्यावेळेस पोटाचा घेर वाढू लागला त्यावेळी मुलीच्या पालकांनी तिला जळगाव शहरातील सरकारी रुग्णालयात तपासणी करण्यासाठी आणले. दरम्यान, तपासातून ही गतीमंद मुलगी गर्भवती असल्याची धक्कादायक बाब उघड झाली.
संशियतावर गुन्हा दाखल –
पाचोरा तालुक्यातील पिंपळगाव (हरे.) पोलिसात दि.17 ऑक्टोबर रोजी धाव घेत अनोळखी संशयित आरोपी विरोधात अत्याचार केल्याप्रकरणी भादंविनुसार कलम 376, पोक्सो कलम 4 प्रमाणे गुन्हा दाखल करण्यात आला आहे. पुढील तपास पोलीस उपनिरीक्षक अमोल पवार हे करीत आहेत.
