जळगाव, 10 नोव्हेंबर : जिल्हा रूग्णालय व अधिनस्त ग्रामीण रूग्णालयांना जिल्हा वार्षिक योजनेतून 10 नवीन रूग्णवाहिका खरेदीस पालकमंत्री गुलाबराव पाटलांनी मंजुरी दिली होती. जिल्हाधिकारी आयुष प्रसाद यांच्या पाठपुराव्यामुळे रूग्णवाहिका खरेदीच्या प्रस्तावास आरोग्य सेवा आयुक्तांनी एका दिवसातच तत्काळ तांत्रिक मान्यता दिली आहे. जानेवारी 2024 पर्यंत या नवीन रूग्णवाहिका रूग्णसेवेत दाखल होणार असल्याची माहिती जिल्हा शल्यचिकित्सक डॉ.किरण पाटील यांनी दिली आहे.
आरोग्य सेवा कार्यालयास पाठवला होता प्रस्ताव –
जिल्हा वार्षिक योजना 2023-24 अंतर्गत जिल्हा सामान्य रूग्णालय, जळगाव व त्यांच्या अधिनस्त 9 ग्रामीण रूग्णालयांना रूग्णवाहिका खरेदी करण्यास पालकमंत्री गुलाबराव पाटील यांच्याद्वारे मान्यता देण्यात आली होती. त्यानुसार, जिल्हा सामान्य रूग्णालयाने याबाबतचा तांत्रिक मान्यतेचा प्रस्ताव 8 नोव्हेंबर 2023 रोजी मुंबई येथे आरोग्य सेवा आयुक्त कार्यालयास पाठविला.
जिल्हाधिकाऱ्यांच्या पाठपुराव्यास यश –
दरम्यान, एरवी प्रस्ताव पाठविल्यानंतर या प्रस्तावाच्या तांत्रिक मान्यतेस साधारणत: दीड महिना लागतो. मात्र, जिल्हाधिकारी आयुष प्रसाद यांनी आरोग्य सेवा आयुक्त धीरजकुमार यांच्याशी दूरध्वनीवरून चर्चा केली. धीरजकुमार यांनी गतिमान प्रशासनाचा वस्तुपाठ घालून देत प्रस्तावाच्या दुसऱ्या दिवशी म्हणजे 9 नोव्हेंबर रोजी या प्रस्तावास तांत्रिक मान्यता दिली आहे.
‘या’ रूग्णालयांना मिळणार रूग्णवाहिका –
तांत्रिक मान्यतेनंतर जळगाव जिल्ह्यासाठी आता रूग्णवाहिका खरेदीचा मार्ग मोकळा झाला आहे. जिल्हा सामान्य रूग्णालयास एक रूग्णवाहिका व ग्रामीण रूग्णालय न्हावी (ता.यावल), बोदवड, अमळनेर, एरंडोल, भडगाव, पाचोरा, मेहुणबारे (ता.चाळीसगाव), पहुर (ता.जामनेर) व पिंपळगाव – हरेश्र्वर (ता.पाचोरा) येथे प्रत्येक अशा एकूण 10 नवीन रूग्णवाहिका खरेदी करण्यात येणार आहेत. रूग्णवाहिका खरेदीसाठी जिल्हा वार्षिक योजनेत 1 कोटी 80 लाख 63 हजार रूपयांची तरतूद मंजूर करण्यात आली आहे.
