पाचोरा, 2 नोव्हेंबर: पाचोरा येथील द वर्ल्ड स्कूलमध्ये नुकत्याच संपन्न झालेल्या तालुकास्तरीय विज्ञान प्रदर्शनात एस.एस.एम.एम महाविद्यालयाच्या इयत्ता 12 वी विज्ञान शाखेचा विद्यार्थी हितेश राठोड याने उल्लेखनीय यश संपादन केले आहे. हितेश याने महिलांच्या सुरक्षेच्या दृष्टीने अत्यंत उपयुक्त असे ‘सुरक्षा’ नावाचे कृत्रिम बुद्धिमत्तेवर (AI) आधारित वेब ॲप विकसित केले होते.
सध्याच्या काळात महिलांच्या सुरक्षेचा प्रश्न ऐरणीवर असताना या ॲपद्वारे तात्काळ मदत, लोकेशन ट्रॅकिंग आणि आपत्कालीन परिस्थितीत मदत मिळण्यासारख्या सुविधा उपलब्ध होणार आहेत. त्याच्या या नाविन्यपूर्ण आणि समाजोपयोगी संकल्पनेची परीक्षकांनी विशेष दखल घेत त्याला द्वितीय क्रमांकाचे पारितोषिक प्रदान केले.
या यशस्वी प्रकल्पासाठी हितेश ला एस.एस.एम.एम महाविद्यालयाचे प्राध्यापक प्रा. ललित पाटील यांचे मोलाचे मार्गदर्शन लाभले. प्रा. पाटील यांनी त्याला तांत्रिक बाबींपासून ते सादरीकरणापर्यंत सर्व टप्प्यावर मार्गदर्शन केले.
विद्यार्थ्याच्या या यशाबद्दल संस्थेचे अध्यक्ष मा. भाऊसाहेब श्री. दिलीप वाघ, चेअरमन संजय वाघ, व्हाईस चेअरमन व्ही. टी. जोशी, मानद सचिव महेश देशमुख व कनिष्ठ महाविद्यालयीन व्यवस्थापन समितीचे चेअरमन सुभाष तोतला, महाविद्यालयाचे प्राचार्य डॉ. वासुदेव वले कनिष्ठ महाविद्यालयाच्या उपप्राचार्या एस. बी. गुंजाळ, पर्यवेक्षक जे पी बडगुजर आणि सर्व प्राध्यापक वर्ग यांनी अभिनंदन करून जळगाव येथे होणाऱ्या जिल्हास्तरीय प्रदर्शनासाठी शुभेच्छा दिल्या. या यशामुळे एस.एस.एम.एम महाविद्यालयाच्या शिरपेचात आणखी एक मानाचा तुरा रोवला गेला आहे.
