पारोळा, 11 जानेवारी : पारोळा शहरातून एक धक्कादायक घटना समोर आली आहे. पारोळा शहरातील अशोक नगर परिसरात चोरीची घटना घडली. या ठिकाणी चोरट्यांनी तब्बल 60 हजारांचे दागिने चोरून नेले. बंद घराच्या कडीकोंडा तोडून चोरट्यांनी आपला डाव साधला. याप्रकरणी पोलीस ठाण्यात फिर्याद देण्यात आली आहे.
काय आहे संपूर्ण बातमी –
पारोळा शहरातील अशोकनगर भागात चोरीची घटना घडली. याप्रकरणी समाधान बापू भवर (रा. रहिपुरी, ता. चाळीसगाव, हल्ली मुक्काम अशोक नगर, पारोळा) यांनी पोलिसात फिर्याद दिली आहे. फिर्यादीत त्यांनी म्हटले आहे की, 9 जानेवारीला सोमवारी सायंकाळी सात वाजेपर्यंत घराला कुलूप होते. दुसऱ्या दिवशी मंगळवारी सकाळी घराशेजारी राहणारे राहुल नानाजी पाटील यांनी सकाळी आठ वाजेच्या सुमारास तुमचा दरवाजाचा कडी कोंडा तुटलेला अवस्थेत दिसून आल्याचे कळविले.
यावेळी मी व वडील बापु भवर आम्ही घरात जाऊन बघितले असता हॉलमध्ये लोखंडी कपाटाचा तसेच स्वयंपाक घरातील लहान लोखंडी कपाटातील सामान अस्ताव्यस्त दिसुन आला. तसेच कपाटात ठेवलेले 45 हजारांचा सोन्याचा नेकलेस आणि 15 हजारांचे कानातले टोंगल, असे एकूण 60 हजारांचे दागिने चोरट्यांना लंपास केल्याचे दिसले.
चोरीच्या या घटनेनंतर पारोळा पोलीस ठाण्यात गुन्हा दाखल करण्यात आला आहे. तसेच या प्रकरणाचा तपास पारोळा पोलीस करत आहेत. दरम्यान, चोरीच्या या घटनेनंतर परिसरात भीतीचे वातावरण निर्माण झाले आहे.
