पाचोरा, 13 जानेवारी : पाचोरा येथून एक दुर्दैवी घटना समोर आली आहे. धावत्या रेल्वेखाली पुतण्याचा दुर्दैवी मृत्यू झाला. यानंतर पुतण्याच्या मृत्यबाबत माहिती होताच, हा धक्का सहन न झाल्याने काकूचाही हृदयविकाराच्या धक्क्याने मृत्यू झाला. पाचोरा शहरातील हनुमान नगर भागात बुधवारी रात्रीच्या सुमारास ही दुर्दैवी घटना घडली. काकू आणि पुतण्याच्या मृत्यूनंतर दोघांचीही अंत्ययात्रा एकाच वेळी काढण्यात आली. पाचोरा तालुक्यात घडलेल्या मन हेलावणाऱ्या घटनेमुळे सर्वत्र हळहळ व्यक्त होत आहे.
काय आहे संपूर्ण बातमी –
पाचोरा शहरातील हनुमान नगर भागातील दादाभाऊ मोरे हे आपल्या काकाच्या उत्तरकार्यासाठी वरखेडी येथे परिवारासह गेले होते. यानंतर ते घरी आल्यावर त्यांचा मुलगा किरण दादाभाऊ सोनार (मोरे) (वय 27) हा तारखेडा रोडकडे रेल्वे मार्ग ओलांडून जात होता. याचवेळी रेल्वे मार्ग ओलांडून जात असताना रेल्वेचा धक्का लागून तो गाडीखाली आला आणि दुर्दैवाने त्यातच त्याचा मृत्यू झाला.
दरम्यान, या घटनेची माहिती रेल्वेचे लोको पायलट जे.एच. देवरे यांनी पाचोरा रेल्वे स्टेशन उपप्रबंधकांना दिली. दुसरीकडे किरणच्या अचानक मृत्यूची घटना माहिती होताच त्याच्या काकू उषाबाई मन्नू सोनार (वय 40) यांना जोरदार धक्का बसला. हा धक्का सहन न झाल्याने त्यांना हृदयविकाराचा झटका आला. यानंतर त्यांना तत्काळ जळगाव येथे उपचारासाठी घेऊन जात असतानाच वाटेतच त्यांचाही मृत्यू झाला.
यानंतर बुधवारी रात्री मृत काकू आणि पुतण्यावर एकाचवेळी अंत्यसंस्कार करण्यात आले. पुतण्याच्या रेल्वे अपघाताची पाचोरा पोलिसात नोंद करण्यात आली आहे. दरम्यान, या घटनेने पाचोरा परिसरात एकच हळहळ व्यक्त होत आहे.
